БО «ХОВАР» ВА БОХАБАР! Имрӯз аз таъсиси Радиои «Ховар» 12 сол сипарӣ гардид

Июнь 2, 2023 14:21

ДУШАНБЕ, 02.06.2023 /АМИТ «Ховар»/. Имрӯз, 2 июн аз таъсиси Радиои «FM Ховар» 12 сол сипарӣ гардид. Дар ҳамин рӯзи соли 2011 бо Қарори Ҳукумати Ҷумҳурии Тоҷикистон дар назди Агентии миллии иттилоотии Тоҷикистон «Ховар»-и назди Ҳукумати Ҷумҳурии Тоҷикистон Корхонаи воҳиди давлатии «Радиои FM Ховар» таъсис дода шуд.

Радиои «FM Ховар» чун шабакаи давлатӣ асосан дар формати иттилоотӣ — мусиқӣ бо забони тоҷикӣ ва русӣ дар ҳаҷми 24 соат дар як шабонарӯз барномаҳо пахш менамояд.

Дар айни замон Радиои «FM Ховар» дар шаҳри Душанбе ва атрофи он рӯйи мавҷи 101,5 FM, вилояти Хатлон (шаҳри Бохтар ва ноҳияҳои атрофи он, шаҳри Кӯлоб ва ноҳияи атрофи он ) рӯйи мавҷи 100,5 FM ва вилояти Суғд (шаҳри Хуҷанд ва ноҳияиҳои атрофи он) рӯйи мавҷи 91,5 FM пахш мегардад.

Фарқияти формати Радио «FM Ховар» аз дигар радиоҳои мамлакат дар он аст, ки он иттилоотӣ буда, дар як шабонарӯз бештар аз 40 нашри ахборро бо фарогирии гузоришҳо бо забонҳои тоҷикӣ ва русӣ пешниҳод менамояд.

Дар ин радиф барномаҳои таҳлилӣ бо ҷанбаи иттилоотӣ низ таҳия мегарданд. Инчунин бо мақсади таъмини фароғати шунавандаҳо дар баробари суруду оҳангҳо, ки ҳеҷ як радиоро бе онҳо тасаввур карда намешавад, якчанд барномаҳои фарҳангӣ-фароғатӣ омода мегардад.

Аз ҷумла, аз оғози фаъолияти радио барномаҳои «Бозору харидор», «Тафсир», «Нигоҳе ба рӯйдодҳои ҳафта», «Ҳафт рӯзи олам», «Се дар як», «Шом омадаем», «Рози рӯз», «Мухлис», «Пайванд», «Муҳаббат», «Накҳати роз», «Меҳмони Ховар», «Толеънома», «Бизнесмен»(Тоҷир), «Суруди ҳафта», «Фараҳнӯш», «Чароғи шаб», «Сиришти зан», «Ҳамқадами Истиқлол», «Пайрави дониш», «Сеҳри рақамҳо», «Набзи иқтисод» ва чанде дигар бо бахшҳои гуногун пешниҳоди шунавандаҳо мегардид.

Баъдан дар радифи бахшҳои хабарӣ ва гузоришҳо ҳамчунин барномаҳои «Бозтоб», «Дармон», «Маърифати ҳуқуқӣ», «Меҳмони Ховар», «Садои мондагор», «Оинаи адаб», «Дурдонаҳо аз гуфтори Президент», «Аз фармудаҳои бузургон» (Панду андарзи бузургон), «Гарде аз домани андешаҳо» («Ёддоштҳо»-и С.Айнӣ, панду ҳикматҳо) ҳамарӯза мавриди таваҷҷуҳи шунавандаҳо қарор дода мешуд. Дар ин баробар роликҳои зиёде, ки васфи Ватан-модар, истиқлолу ваҳдати миллӣ, забони давлатӣ, ҷавонон, амнияту осудагии меҳан, ҳифзи дастовардҳои миллиро тарғиб мекунанд, дар фосилаи бахшҳои хабарӣ ва суруду оҳангҳо пахш мегарданд.

Дар айни замон дарбаробари барномаҳои «Хабар» ва гузоришҳои рӯзмарра ҳамчунин барномаҳои «Гуфтугӯ», «Мавқеъ», «Бозтоб», «Сарват», «Дармон», «Ҷаҳони андеша»,«Соярӯшан», «Маърифати ҳуқуқӣ», «Раҳнамун», «Рӯҳафзо», «Тафсир», «Маслиҳатимутахассис», «Шарҳи коршинос», «Адиб ва замон», «Тақвими Ховар», «Ҳамқадами замон», «Ҷаҳони варзиш», «Аз фурӯғто фурӯғ», «Зан ва зиндагӣ», «Сафобахш» ва «Тозаэҷод» таҳия ва пешниҳоди шунавандаҳо мегарданд.

Инак, 12 сол аст, ки садои Радиои «FM Ховар» дар баробари дигар расонаҳо, фазои иттилоотии Тоҷикистони соҳибистиқлолро бо бахшҳои хабарӣ ва барномаҳои ҷолибу рангин пур мекунад. Ҳайати гурӯҳи эҷодиро ҷавонони навкор ва чанд рӯзноманигори соҳибтаҷрибае, ки аз дигар радиоҳо ба ҳамкорӣ даъват гардида буданд, ташкил медоданд. Дар ин муддат рӯзноманигорони зиёде бо ин радио ҳамкорӣ карда, таҷрибаи касбии худро сайқал доданд.

АКС: АМИТ «Ховар»

Июнь 2, 2023 14:21

Хабарҳои дигари ин бахш

«ДАР ЧЕҲРААШ НУРИ ХУДО ДОРАД». Таҳти ин унвон бахшида ба Рӯзи Президент намоиши асарҳо баргузор шуд
Дар Душанбе Форуми байналмилалӣ ва намоиши либосҳои миллӣ баргузор гардид
Дар Душанбе маҳфили эҷодии Шоири халқии Тоҷикистон Давлат Сафар баргузор мегардад
Дар кинотеатри «Ватан» нахустнамоиши филми муштараки «Дурахши ахтарон: Ҷомӣ ва Навоӣ» баргузор мешавад
ТАВСИЯИ МУТАХАССИС. Дар мавриди фоидаи ғизо ва нӯшокиҳо барои саломатӣ дар фасли зимистон
Китоби «Сотим Улуғзода дар шинохти Пешвои миллат» ба нашр расид
Бахшида ба фаъолияти Президенти Тоҷикистон китоби нав рӯнамоӣ гардид
Шералӣ Хоҷазода: «Маърифати ҳуқуқӣ омили муҳими ҳифзи мероси таърихию фарҳангӣ мебошад»
Доир ба саҳми Эмомалӣ Раҳмон дар татбиқи стратегияи рушди Ҷумҳурии Тоҷикистон китоби нав рӯнамоӣ гардид
Таҳти унвони «Президент — шаҳсутуни истиқлол ва давлатдории миллӣ» конференсияи ҷумҳуриявӣ доир шуд
Ҷилди сеюми китоби «Абармарди таърихсоз»-и академик Фарҳод Раҳимӣ ба нашр расид
Ҳамкории Тоҷикистон ва Қазоқистон дар соҳаи ҳифзи мероси фарҳангӣ ва хаттӣ густариш меёбад