Шӯрои муштараки соҳибкорони Тоҷикистон ва Қатар таъсис меёбад

ДУШАНБЕ, 27.06.2023. /АМИТ «Ховар»/. 25 июн дар шаҳри Давҳа Созишнома байни Палатаи савдо ва саноати Ҷумҳурии Тоҷикистон ва Палатаи савдо ва саноати Давлати Қатар дар бораи таъсиси Шӯрои муштараки соҳибкорон ба имзо расид. Дар ин хусус ба АМИТ «Ховар» дар Сафорати  Ҷумҳурии Тоҷикистон дар Давлати Қатар хабар доданд.

Созишномаи мазкур дар доираи мулоқоти раиси Палатаи савдо ва саноати Ҷумҳурии Тоҷикистон Ҷамшед Ҷумахонзода  бо муовини якуми раиси Палатаи савдо ва саноати Давлати Қатар Муҳаммад ибни Аҳмад Тавор ал-Куворӣ ба имзо расонида шуд.

Ҷонибҳо ҳамчунин роҳҳои тақвияту густариши ҳамкорӣ дар соҳаҳои тиҷорату иқтисод, саноат, сармоягузорӣ, содироту воридот ва дар ин замина эҷоди абзорҳои самараноки ҳамкории мутақобилан судманди бахши хусусии ду давлатро баррасӣ намуданд.

Таъкид гардид, ки ба имзо расидани ин созишнома робитаҳои тиҷоратӣ байни Ҷумҳурии Тоҷикистон ва Давлати ба сатҳи сифатан нав хоҳанд баромад.

АКС: Сафорати Ҷумҳурии Тоҷикистон дар Давлати Қатар