Тӯфони «Ханун» ин ҳафта ба Ҷопон ва Кореяи Ҷанубӣ наздик мешавад

ДУШАНБЕ, 08.08.2023 /АМИТ «Ховар»/. Тӯфони «Ханун» бо вазидани боди сахт ин ҳафта ба ҷанубу ғарби Ҷопон наздик мешавад. Агентии обуҳавошиносии мамлакат субҳи имрӯз аллакай ҳушдор додааст, ки тӯфон на танҳо борони шадид ҳамроҳ меорад, балки метавонад боиси ярч ва обхезиҳо гардад, иттилоъ медиҳад «Казинформ» бо истинод ба Кyоdо.

Тибқи иттилои агентии обуҳавошиносии Ҷопон, пас аз оҳиста ҳаракат намудан дар атрофи префектураи ҷанубии Окинава тӯфон ба самти шарқ ҳаракат менамояд, ки зимнан, ҷазираи Амами-Осимаи префектураи Кагосима низ ба минтақаи тӯфонӣ ворид мешавад.

Агентии Yonhap иттилоъ медиҳад, ки тибқи пешгӯии обуҳавошиносони Кореяи Ҷанубӣ, рӯзи панҷшанбе тӯфон ба шимол ба соҳили ҷанубу шарқии нимҷазираи Корея равона хоҳад шуд.

Азиза ИКРОМ,
АМИТ «Ховар»

АКС аз манбаъҳои боз