«БЕҲТАРИН ХИЗМАТЧИИ ДАВЛАТӢ». Дар Ҳисор даври минтақавии озмун аз ҳисоби занҳо баргузор гардид

ДУШАНБЕ, 23.09.2023 /АМИТ «Ховар»/. Дар шаҳри Ҳисор даври минтақавии озмуни «Беҳтарин хизматчии давлатӣ» аз ҳисоби занҳо баргузор гардид. Дар озмун довталабон аз 8 шаҳру ноҳияи тобеи ҷумҳурӣ, аз ҷумла шаҳри Ҳисор иштирок намуда, ғолибони даври минтақавӣ муайян гардиданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор хабар медиҳад.

Довталабон дар асоси талаботи низомнома диктант бо забони русӣ ва иншо бо забони давлатӣ навишта, ҳамчунин аз ҷониби ҳакамон бо усули саволу ҷавоб қобилият ва малакаю донишашон дар фаъолияти хизмати давлатӣ санҷида шуд.

Аз шаҳри Ҳисор дар байни хизматчиёни давлатӣ аз мақомоти иҷроияи ҳокимияти давлатии шаҳру ноҳияҳои тобеи ҷумҳурӣ мутахассиси пешбари шуъбаи умумӣ, назорат ва муроҷиати шаҳрвандон Файзимоҳ Одинаева сазовори ҷойи дуюм, байни ҷамоатҳои шаҳраку деҳот котиби Ҷамоати шаҳраки Ҳисор Зулфия Васихова соҳиби ҷойи якум ва котиби Ҷамоати шаҳраки Шарора Гавҳар Одинаева сазовори ҷойи сеюм гардиданд.

Ғолибонро даври ниҳоӣ – ҷумҳуриявӣ дар пеш аст, иттилоъ медиҳад манбаъ.

 АКС: Мақомоти иҷроияи ҳокимияти давлатии шаҳри Ҳисор