Дар Душанбе ҷаласаи 16-уми Комиссияи байниҳукуматии Тоҷикистон ва Беларус ба кор оғоз намуд
ДУШАНБЕ, 28.09.2023. /АМИТ «Ховар»/. Имрӯз дар шаҳри Душанбе ҷаласаи 16-уми Комиссияи байниҳукуматии Ҷумҳурии Тоҷикистон ва Ҷумҳурии Беларус ба кор оғоз намуд, хабар медиҳад хабарнигори АМИТ «Ховар».
Дар кори ҷаласа Вазири кишоварзии Ҷумҳурии Тоҷикистон Қурбон Ҳакимзода ва ҳайати Ҷумҳурии Беларус таҳти роҳбарии Вазири кишоварзӣ ва озуқавории ин кишвар Сергей Бартош-ҳамраиси қисми беларусии Комиссияи байниҳукуматии Тоҷикистон ва Беларус доир ба ҳамкории тиҷоратию иқтисодӣ иштирок доранд.
Таъкид гардид, ки муносибати Тоҷикистон ва Беларус дар марҳилаи муосир дар сатҳи дуҷониба ва ҳам бисёрҷониба хислати рушди бомаром касб намуда, муколамаи фаъоли сиёсӣ дар сатҳи олӣ ба ин муносибатҳо такони мусбат мебахшад.
Ҷонибҳо ҳолати кунунӣ ва дурнамои ҳамкории тиҷоратию иқтисодӣ ва сармоягузорӣ, ҳамкорӣ дар соҳаи кишоварзӣ, саноат, озуқаворӣ, илму маориф, тандурустӣ, дорусозӣ, ҳифзи комплекси агросаноатӣ ва дигар масъалаҳои ҷолиби таваҷҷуҳи тарафайнро мавриди баррасӣ қарор доданд.
Иброз гардид, ки ҷиҳати пешбурди маҷмуи муносибатҳои дуҷониба ва муайян намудани дурнамо ва рушди минбаъдаи он фаъолияти Комиссияи байниҳукуматии Тоҷикистон ва Беларус оид ба масъалаҳои ҳамкории иқтисодию тиҷоратӣ амалӣ шудааст.
Қурбон Ҳакимзода изҳор дошт, ки яке аз нишондиҳандаҳои асосии рушди ҳамкории иқтисодӣ-мубодилаи мол ба шумор рафта, солҳои охир муомилоти байни ду давлат афзуда, номгӯи молҳои фиристодашаванда васеъ гардид.
Иттилоъ дода шуд, ки соли 2022 ҳаҷми муомилоти мол бо Ҷумҳурии Беларус ду баробар афзуда, 89,4 миллион долари ИМА-ро ташкил додааст. Дар ин давра ҳаҷми содирот аз Тоҷикистон ба Беларус 7,2 миллион доллар ва воридот аз Беларус ба Тоҷикистон 82,2 миллион долларро ташкил додааст. Тоҷикистон асосан ба Беларус пахта, нах, мева ва меваҳои хушк содирот намудааст. Ҳамзамон табодули мол байни ду давлат дар 6 моҳи соли раовн дар муқоиса ба соли 2022 62,4 фоиз афзоиш ёфт.
Ёдовар мешавем, ки 11-12 октябри соли 2022 дар ҷараёни сафари расмии Президенти Ҷумҳурии Беларус ба Ҷумҳурии Тоҷикистон бо мақсади густариши минбаъдаи муносибатҳои Тоҷикистон ва Беларус байни вазоратҳои кишоварзии ду давлат Барномаи «Харитаи роҳи ҳамкории дуҷонибаи Ҷумҳурии Тоҷикистон ва Ҷумҳурии Беларус барои солҳои 2022-2026» ба имзо расид.
Комиссияи байниҳукуматии Ҷумҳурии Тоҷикистон ва Ҷумҳурии Беларус мақоми ҳамоҳангсоз ва машваратӣ буда, ҳадафи он баланд бардоштани самаранокии муносибатҳои тиҷоратӣ байни ташкилоту ассотсиатсияҳои Тоҷикистон ва Беларус, инчунин муайянкунӣ ва рафъи монеаҳо дар роҳи тавсеаи ҳамкории тиҷоратию иқтисодии дуҷониба ба шумор меравад.
Шаҳлои САДРИДДИН,
АМИТ «Ховар»
АКС: АМИТ «Ховар»
Дар Агентии инноватсия ва технологияҳои рақамӣ масъалаҳои зеҳни сунъӣ ва амнияти рақамӣ баррасӣ шуданд
Ҳамкории стратегӣ дар самти ҷалби сармоягузории устувор ва маблағгузории иқлимӣ тақвият меёбад
Намояндаи Бонки миллии Тоҷикистон дар ҷаласаи роҳбарони бонкҳои марказии кишварҳои Шарқи Наздик ва Осиёи Марказӣ иштирок намуд
Дар Душанбе татбиқи «Барномаи давлатии кабудизоркунии Ҷумҳурии Тоҷикистон барои давраи то соли 2040» баррасӣ гардид
Вазири молияи Тоҷикистон дар Бангкок бо роҳбарияти Фонди кувайтии рушди иқтисодиёти араб мулоқот намуд
Дар доираи Форуми соҳибкории «Тоҷикистон, ба пеш!» ду Ёддошти тафоҳум дар соҳаи энергетика ба имзо расид
Дар 25 соли охир аз ҷониби соҳибкорон зиёда аз 4 миллион ҷойи кор таъсис дода шудааст
Дар Душанбе татбиқи «Барномаи рушди таҳвилгарон ва содирот» бо ҳайати Гурӯҳи Бонки ҷаҳонӣ баррасӣ гардид
Дурнамои рушди ҳамкорӣ байни Тоҷикистон ва Чехия дар соҳаи нақлиёти роҳи оҳан баррасӣ гардид
Масъалаи истифодаи механизмҳои нави маблағгузорӣ барои татбиқи лоиҳаҳои афзалиятноки Тоҷикистон дар Бангкок баррасӣ шуд
РУШДИ ИҚТИСОДИ МИЛЛӢ. Дар нуҳ моҳи соли 2026 8,3 фоиз таъмин гардид
Олимони тоҷик парвариши гандуми тирамоҳӣ ва пахтаро дар шароити тағйирёбии иқлим баррасӣ намуданд
