«Душанбе-Инвест 2023» ба ҷалби сармоя барои рушди иқтисоди Тоҷикистон мусоидат менамояд

ДУШАНБЕ, 21.09.2023 /АМИТ «Ховар»/. 29-30 сентябр дар шаҳри Душанбе Форуми байналмилалии сармоягузории​ «Душанбе-Инвест 2023» баргузор мегардад. Форуми мазкур бо ибтикори Кумитаи давлатии сармоягузорӣ ва идораи амволи давлатии ҷумҳурӣ дар ҳамкорӣ бо Мақомоти иҷроияи ҳокимияти давлатии шаҳри Душанбе гузаронида шуда, дар он доираҳои соҳибкорони ватанию хориҷӣ иштирок менамоянд.

Дар Кумитаи давлатии сармоягузорӣ ва идораи амволи давлатии ҷумҳурӣ ба АМИТ «Ховар» иттилоъ доданд, ки ҳадафи форум- ҷалби сармоягузорони дохиливу хориҷӣ ба рушди соҳаҳои афзалиятноки иқтисоди мамлакат мебошад.

Форум 9 самтро фаро гирифта, дар онҳо масъалаҳои марбут ба пайдо намудани имконияти сармоягузорӣ дар соҳаҳои саноат, энергетика, сайёҳӣ, нақлиёт, тандурустӣ, молия ва содирот баррасӣ мегарданд.

Баргузории Форуми «Душанбе-Инвест 2023» ба соҳибкорон барои ҷалби сармоягузориҳо ва пайдо намудани шарикони тиҷоратӣ кумак менамояд.​

АКС аз манбаъҳои боз