ОБОДОНӢ ДАР МАҲАЛ. Сокинони деҳаи Шӯраки Истаравшан бо оби нӯшокӣ ва полезӣ таъмин мегарданд

ДУШАНБЕ, 19.09.2023 /АМИТ «Ховар»/. Сокинони деҳаи Шӯраки шаҳри Истаравшан бо оби нӯшокӣ ва полезӣ таъмин мегарданд, хабар медиҳад АМИТ «Ховар» бо истинод ба дафтари матбуоти Раиси шаҳри Истаравшан.

Имрӯз Раиси шаҳри Истаравшан Адҳам Маъмурзода дар маҳаллаи Ясии деҳаи Шӯраки деҳоти Гули сурх бо ҷараёни корҳои омодагӣ барои таъмини аҳолӣ бо оби нӯшокӣ ва полезӣ шинос шуда, барои ҳарчи зудтар бо об таъмин намудани аҳолии деҳот масъулинро вазифадор намуданд.

Чоҳи амудӣ бо дастгирии Мақомоти иҷроияи ҳокимияти давлатии шаҳри Истаравшан бо ҷудо гардидани 250 ҳазор сомонӣ ва беш аз 170 ҳазор сомонӣ аз ҳисоби сокинони Ҷамоати деҳоти Гули Сурх, деҳаи Шӯрак бунёд ёфта, беш аз 300 хоҷагӣ бо оби тозаи ошомиданӣ таъмин мегарданд.

Хати оби полезӣ ва нӯшокӣ тавассути чоҳи амудӣ бо истифода аз қубури қутраш 160 мм аз чуқурии 160 метр дастрас шуда, инчунин он барои обёрӣ намудани беш аз 7 гектар заминҳои бекорхобида пешбинӣ шудааст.

Иқдоми баъдинаи сокинони маҳалла бо оби нӯшокӣ таъмин намудани ҳар хонаи дурдаст бо роҳи хобонидани қубурҳои обгузар мебошад.

АКС: дафтари матбуоти Раиси шаҳри Истаравшан