Соли равон 4418 нафар сайёҳони хориҷӣ ба тамошои Бадахшон омадаанд

ДУШАНБЕ, 25.10.2023. /АМИТ «Ховар»/. Соли равон 14 ҳазору 915 сайёҳ мавзеъҳои ҷолиби Вилояти Мухтори Кўҳистони Бадахшонро тамошо намудаанд, ки аз ин шумора 4418 нафарро сайёҳони хориҷӣ ташкил медиҳанд. Ин омор нисбат ба ҳамин давраи соли гузашта 1,8 баробар зиёд аст, яъне шумораи сайёҳон дар вилоят рӯ ба афзоиш дорад. Дар ин хусус АМИТ «Ховар» бо истинод ба шуъбаи рушди сайёҳии мақомоти иҷроияи ҳокимияти давлатии вилоят хабар медиҳад.

Бояд гуфт, ки дар ҳудуди вилоят бештар аз 700 ёдгории таърихӣ мавҷуд мебошанд, ки масъулин баҳри нигоҳу бин ва аз нав барқарор намудани онҳо пайваста тадбирҳои зарурӣ меандешанд. Аз ҷумла, барои таъмиру навсозии Осорхонаи «Карон», меҳмонхонаи замонавӣ дар ноҳияи Ванҷ, мақбараи Шоҳ Бурҳони Валӣ, осоишгоҳи «Авҷ», боғҳои фарҳангию фароғатии шаҳри Хоруғ, ноҳияҳои Рӯшону Мурғоб ва қалъаи Ямчуни ноҳияи Ишкошим маблағ ҷудо гардид. Айни ҳол дар вилоят 49 ширкати сайёҳӣ фаъолият менамояд.

Соли равон, ҳамчунин, барои 26 ҳомстей (меҳмонсарой) ба маблағи 239456 доллари ИМА таҷҳизоти замонавӣ дастрас гардид. Айни замон дар ҳудуди вилоят 34 меҳмонхонаи хурду миёна, 164 ҳомстей фаъолият намуда, дар маҷмуъ, дар як шабонарӯз барои 2412 нафар меҳмон имконияти хизматрасонӣ доранд.

АКС аз манбаъҳои боз