Шаҳри Ҳисор иҷрои нақшаи буҷетро ба 100,1 фоиз расонид

ДУШАНБЕ, 14.11.2023. /АМИТ «Ховар»/. Дар шаҳри Ҳисор иҷрои нақшаи буҷетӣ дар даҳмоҳаи соли равон ба ҷои 214,9 млн сомонии пешбинишуда 215,2 млн сомониро ташкил дод, ки 100,1 фоизи нақшаи андозро дар бар гирифт, хабар медиҳад АМИТ «Ховар» бо истинод ба Мақомоти иҷрояи ҳокимияти давлатии шаҳри Ҳисор.

Суръати рушди ҳаҷми истеҳсоли маҳсулоти минтақавӣ дар даҳ моҳи соли равон 110,6 фоиз таъмин гардида, истеҳсол ва коркарди маҳсулоти саноатӣ 270,7 млн сомонӣ ё нисбат ба ҳамин давраи соли гузашта 12,7 млн сомонӣ зиёд гардидааст.

Шумораи корхонаҳои саноатӣ давоми ду моҳ ду адад афзуда, чор корхона аз нав ба фаъолият шуруъ намуд. Ҳамзамон дар самти фаъолияти соҳаи кишоварзӣ ҳаҷми афзоиши истеҳсоли маҳсулоти умумии кишоварзӣ дар 10 моҳ 859,2 млн сомониро ташкил дод, ки нисбат ба ҳамин давраи соли гузашта 103,2% таъмин шудааст.

Тавре иттилоъ дода шуд, бахшида ба 35-солагии Истиқлоли давлатии Тоҷикистон дар ҷамоатҳои шаҳраку деҳот аз шумораи умумии иншооти ҷашнӣ (1675 адад) то имрӯз 483 иншоот мавриди баҳрабардорӣ қарор гирифтаанд.

АКС: Мақомоти иҷрояи ҳокимияти давлатии шаҳри Ҳисор