МУДОФИАИ ГРАЖДАНӢ. Дар ноҳияи Данғара омӯзишҳои мудофиавӣ амалӣ гардиданд

ДУШАНБЕ, 04.12.2023 /АМИТ «Ховар»/. Кормандони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар ноҳияи Данғараи вилояти Хатлон тамринҳои маҷмуии мудофиаи гражданӣ доир намуданд. Дар ин хусус АМИТ «Ховар» бо истинод ба ин Кумита хабар медиҳад.

Машқҳо дар мавзуи «Амали мақомоти ҳокимияти иҷроияи маҳаллии давлатӣ дар рафъи оқибатҳои офатҳои табиӣ ва истифодаи қувваю воситаҳо барои мудофиаи граждании вилоят» давоми се рӯз идома ёфтанд.

Ин машқҳо таҳти роҳбарии сардори мудофиаи гражданӣ-раиси ноҳия бо иштироки кормандони масъули Кумитаи ҳолатҳои фавқулода ва мудофиаи гражданӣ, намояндагони комиссияҳои мудофиаи граждании ноҳиявӣ ва раисони ҷамоатҳо баргузор гардиданд.

Зимни машқҳо масъалаҳои омодагии мақомоти мудофиаи гражданӣ ва ҳолатҳои фавқулода, Низоми ягонаи давлатии пешгирӣ ва рафъи ҳолатҳои фавқулода, қувваю воситаҳо ба сел, ярч, заминларза ва тахлияи аҳолии ҷамоату деҳоти вилоят мавриди баррасӣ қарор дода шуд.

Дар давраи баргузории машқҳо дараҷаи омодагии аҳолӣ ба муҳофизат аз сел, ярч ва заминҷунбӣ кор карда баромада, сатҳи омодагии қувваю воситаҳои ҳукумати ноҳия дар вокуниш ба ҳолатҳои фавқулода арзёбӣ гардид.

Ғайр аз ин, иншооти муҳофизатии мудофиаи гражданӣ ба ҳолати омодабош гузошта шуд. Дар мувофиқа бо мақомоти иҷроияи ҳокимияти давлатии ноҳия низоми огоҳсозии фаврӣ барои аҳолӣ аз рӯй додани ҳолати фавқулода ва ё таҳдиди он санҷида шуда, корҳои ҳифзи соҳилҳо гузаронида шуданд.

АКС аз манбаъҳои боз