Дар Бонки миллии Тоҷикистон доир ба иҷрои нишондиҳандаҳои Паёми Президенти Тоҷикистон ба Маҷлиси Олӣ нақшаи чорабиниҳо таҳия мешавад

ДУШАНБЕ, 01.02.2024 /АМИТ «Ховар»/. Дар  Паёми  Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» тамоми соҳаҳои ҳаёти сиёсию иқтисодӣ ва иҷтимоию  фарҳангии ҷомеа, аз ҷумла низоми бонкии мамлакат дар соли 2023 натиҷагирӣ ва  ҷиҳати фаъолияти минбаъдаи соҳа  вазифагузорӣ карда шуд. Аз нуктаҳои Паёми  Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон бармеояд, ки вазифагузориҳо  ба ҳифзи манфиатҳои миллӣ, рушди давлатдорӣ, ободию пешрафти мамлакат ва зиндагии шоистаи мардум равона шудаанд.

Дар ин хусус Раиси Бонки миллии Тоҷикистон Фирдавс Толибзода дар ҷаласаи ҳайати роҳбарият ва кормандони Бонки миллии Тоҷикистон дар робита ба омӯзиши нуктаҳои муҳими Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон сухан гуфт, иттилоъ медиҳад АМИТ «Ховар» бо истинод ба Бонки миллии Тоҷикистон.

Иброз гардид, ки  Президенти Тоҷикистон дар оғози Паём ба Маҷлиси Олӣ ёдовар шуданд, ки соли 2023 бо вуҷуди душвориҳо барои Тоҷикистон соли бобарор буд ва дар ҳамаи соҳаҳои ҳаёти ҷомеа пешравиҳо ба назар расиданд. Аз ҷумла, маҷмуи маҳсулоти дохилӣ соли 2023   8,3 фоиз зиёд гардид.

Раиси Бонки миллии  Тоҷикистон иброз дошт, ки солҳои охир таваҷҷуҳи Ҳукумати мамлакат ба масъалаҳои пешгирии таъсири хавфҳои эҳтимолӣ ба иқтисоди миллӣ, истифодаи самараноки иқтидори мавҷуда, саноатикунонии босуръати мамлакат ва таъсиси ҷойҳои нави корӣ равона гардидааст.

Ташаккули иқтисоди «сабз», суръат бахшидани раванди рақамикунонии иқтисодиёт, рушди неруи инсонӣ, баланд бардоштани рақобатнокии маҳсулоти ватанӣ, тақвияти имконияти содиротии мамлакат ва беҳтар гардонидани сифати хизматрасониҳо аз ҷумлаи масъалаҳои афзалиятноки мамлакат ба ҳисоб мераванд.

Таъкид шуд, ки дар ин давра сатҳи таваррум муътадил нигоҳ дошта шуда, соли 2023  3,8 фоизро ташкил дод ва ин нишондиҳанда нисбат ба кишварҳои минтақа нисбатан хуб арзёбӣ мешавад.

Дар Паём ба Маҷлиси Олӣ инчунин ба масъалаи афзудани даромади буҷети давлатӣ, хароҷот барои илму маориф, тандурустӣ ва дигар соҳаҳои иҷтимоӣ, дастгирии гурӯҳҳои осебпазири аҳолӣ тавассути пардохти нафақа, кумакпулӣ ва ҷубронпулӣ, пардохти кумаки унвонии иҷтимоӣ барои оилаҳои камбизоат, дастгирии соҳаҳои иҷтимоӣ ва дигар масъалаҳо таваҷҷуҳи хос зоҳир гардид.

Таъкид гардид, ки дар Паём ба Маҷлиси Олӣ ба вазоратҳои молия, рушди иқтисод ва савдо, Бонки миллии Тоҷикистон ва дигар сохтору идораҳо дастур дода шуд, ки дар ду соли минбаъда низоми пардохтҳои ғайринақдиро дар ҳамаи соҳаҳо, аз ҷумла нуқтаҳои савдою хизматрасонӣ пурра ҷорӣ намуда, ҳамгироии фаъолиятро дар ин самт таъмин намоянд.

Инчунин Президенти Тоҷикистон дастур доданд, ки сохторҳои номбурда бо мақсади ҷалби сармояи дохилию хориҷӣ ҷиҳати рушди бозори коғазҳои қиматнок, бахусус коғазҳои қиматноки «сабз» ва бозори такрорӣ тадбирҳои зарурӣ андешанд.

Гуфта шуд, ки дар Бонки миллии Тоҷикистон дар робита ба иҷрои нишондиҳандаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ Нақшаи чорабиниҳо таҳия мешавад. Иҷрои саривақтии он вазифаи муҳими тамоми кормандони Бонки миллии Тоҷикистон мебошад.

АКС: Бонки миллии Тоҷикистон