Таваллуд дар Ҷопон соли 2023 ба сатҳи рекордӣ коҳиш ёфт

ДУШАНБЕ, 28.02.2024 /АМИТ «Ховар»/. Шумораи кӯдаконе, ки ҳамасола дар Ҷопон таваллуд мешаванд, соли ҳаштум аст, ки пайи ҳам коҳиш меёбад ва соли 2023 ба ҳадди ақалли рекордӣ расид, чунин бармеояд аз маълумоти пешакии ҳукумати ин кишвар. Тавре АМИТ «Ховар» иттилоъ медиҳад, дар ин хусус АЗЕРТАҶ бо истинод ба расонаҳои Ҷопон хабар додааст.

Тибқи иттилоъ, мизони таваллуд нисбат ба соли гузашта 5,1% коҳиш ёфта, 758 631 нафар ва шумораи издивоҷҳо 5,9% коҳиш ёфта, 489 281 ҳолатро ташкил додааст. Нахустин маротиба  дар 90 сол ин рақам аз 500 000 поён фаромад, ки коҳиши минбаъдаи аҳолиро пешбинӣ менамояд, зеро дар Ҷопон таваллуд берун аз никоҳ хеле кам аст.

Мувофиқи баҳодиҳии Институти миллии таҳқиқоти демографӣ ва ҳифзи иҷтимоӣ, то соли 2070 аҳолии Ҷопон тақрибан 30% коҳиш ёфта, 87 миллион нафарро ташкил медиҳад (нисбат ба қариб 125 миллиони ҳозира) ва зимнан, аз ҳар даҳ нафар чор нафар 65-сола ва аз он боло мешаванд.

Акс: АЗЕРТАҶ