Ҳайати Тоҷикистон бо роҳбарияти IFC роҳҳои тавсеаи ҳамкориро баррасӣ намуд

ДУШАНБЕ, 18.04.2024 /АМИТ Ховар»/. Ҳайати Ҷумҳурии Тоҷикистон таҳти роҳбарии муовини якуми Сарвазири мамлакат Ҳоким Холиқзода дар ҳошияи ҷаласаҳои баҳории Хазинаи Байналмилалии Асъор /ХБА/ (Spring meetings) дар Вашингтон  бо директори идоракунандаи Корпоратсияи байналмилалии молиявӣ (IFC) Маҳтар Диоп ва ноиби Президенти минтақавии IFC Ҳела Шейхрухоу мулоқот намуд.  Дар ин хусус АМИТ «Ховар» бо истинод ба Бонки миллии Тоҷикистон иттилоъ медиҳад.

Дар мулоқот ҷонибҳо самтҳои гуногуни рушди ҳамкории Тоҷикистон бо IFC, аз ҷумла қарздиҳии мустақим ва сармоягузорӣ дар рушди тиҷорат ва бахши хусусӣ, рушди хизматрасонии муосири рақамии молиявӣ, маблағгузории «сабз» ва ноил шудан ба ҳадафҳо дар қисмати коҳиши оқибатҳои тағйирёбии иқлим, инчунин кумакҳои техникӣ барои баланд бардоштани сатҳи идоракунии корпоративӣ дар бахши бонкӣ, ҳифзи ҳуқуқи истеъмолкунандагон ва такмили заминаи ҳуқуқӣ дар ин бахшро муҳокима намуданд.

Гуфта шуд, ки бо истифода аз робитаҳое, ки аллакай байни институтҳои ҳарду ҷониб амалӣ шудаанд, IFC дастгириашро барои татбиқи ислоҳоте, ки рушди онҳо барои Тоҷикистон афзалиятнок аст, идома медиҳад.

АКС: Бонки миллии Тоҷикистон