Дар ҷамоатҳои шаҳру деҳоти Кӯлоб ҳашари тозагӣ гузаронида шуд

КӮЛОБ, 23.04 2024 /АМИТ «Ховар»/. Бо мақсади саҳм гузоштан дар корҳои созандагию бунёдкорӣ дар ҷамоатҳои шаҳру деҳоти  Кӯлоб бо иштироки роҳбарони ташкилоту муассисаҳои соҳаҳои гуногун корҳои тозагию  поккорӣ гузаронида шуданд. Дар ин хусус хабарнигори минтақавии АМИТ «Ховар» Сулаймон Холзода хабар медиҳад.

Дар шаҳри Кӯлоб ташкилоту муассисаҳо ҳар ҳафта чунин ҳашар мегузаронанд.

Дар баробари тозасозиву поккорӣ инчунин дар сойи Тебалай корҳои тозагӣ анҷом дода шуданд, ки дар баробари  дигар кормандони муассисаҳо саҳми кормандони корхонаҳои коммуналӣ ва ободонӣ назаррас мебошад. Иштирокчиёни ҳашар партовҳоро аз сой бароварда, ба ҷойҳои махсус кашонида, безарар гардониданд.

Роҳбарияти Мақомоти иҷроияи ҳокимияти давлатии шаҳри Кӯлоб  борҳо аз шаҳрвандон, аз ҷумла сокинони назди сойҳо хоҳиш намудаанд, ки ба қадри  заҳмати кормандони  корхонаҳои  коммуналӣ ва ободонӣ, ки аксарияташон  модарон мебошанд, бирасанд. Сокинон бояд партовҳояшонро дар қуттиҳо гузоранд, на дар сойҳо, ки  ин зарар ба муҳити атроф ва саломатии аҳолӣ мебошад.

АКС: Мақомоти иҷроияи ҳокимияти давлатии шаҳри Кӯлоб