«ҲАР ОН КАС, КИ «ШОҲНОМА»-ХОНӢ КУНАД…». Дар Донишгоҳи давлатии Хуҷанд конференсияи байналмилалии илмӣ-амалӣ доир шуд

Май 18, 2024 13:29

ДУШАНБЕ, 18.05.2024. /АМИТ «Ховар»/. Дар Донишгоҳи давлатии Хуҷанд ба номи академик Бобоҷон Ғафуров дар мавзуи «Нақши «Шоҳнома»-и Фирдавсӣ дар таҳкиму густариши забону адабиёт ва илму фарҳанги тоҷик» конференсияи байналмилалии илмӣ-амалӣ доир гардид. Дар ин хусус АМИТ «Ховар» бо истинод ба маркази иттилоот ва таҳлили ин донишгоҳ хабар медиҳад.

Конференсия ба муносибати 35-солагии Истиқлоли давлатии Ҷумҳурии Тоҷикистон ва дар доираи ташаббуси Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба тақдими «Шоҳнома»-и Фирдавсӣ ба ҳар хонаводаи мамлакат гузаронида шуд.

Ректори донишгоҳ Аюб Усмонзода иброз намуд, ки «Шоҳнома»-и Фирдавсӣ дар ҳақиқат ҳамосаи беназиру безаволи миллии мо аст, ки ба таъбири Пешвои миллат муҳтарам Эмомалӣ Раҳмон, «он танҳо китоби базму разм, диловарию қаҳрамонӣ, ривояту афсона нест. Вай пандномаи беназир, ахлоқнома ва дастури омӯзандаи хулқу атвори ҳасана, хислат ва хусусиёти неки инсонӣ аст».

Гуфта шуд, ки ташаббуси Пешвои миллат дар шароити нави таърихӣ барои тақдими «Шоҳнома»-и безаволи Ҳаким Фирдавсӣ баъд аз китоби «Тоҷикон»-и Бобоҷон Ғафурв ба ҳар хонадони тоҷик иқдоми шоистае аст, ки воқеан дар таҳкими оини ватандӯстӣ, худшиносии миллӣ, маърифати таъриху фарҳанги миллат нақши созгор хоҳад гузошт. Ин ду асари безавол, ки ҳарду ҳам ба таъбири Пешвои миллат, «сарчашмаи худшиносии миллӣ» ба шумор мераванд, метавонанд нақши сарнавиштсозе барои имрӯзу фардои мо ва наслҳои оянда гузоранд. Ин асари безавол, ҳарчанд ба сифати як ҳамосаи беназири миллӣ ба таври манзум ба қалам омадааст, вале дар матни он ҳазорон мавзуи дархури ниёзҳои мардум, таъриху фарҳанги миллат, ҷаҳоншиносӣ, оину суннатҳои миллӣ, таърихи давлатдорӣ, кашфи унсурҳои зиндагӣ, мардумшиносӣ, ҷуғрофиёи таърихӣ таҷассум ёфтааст. Муҳимтар аз ҳама, «Шоҳнома» достони ватандӯстӣ, мардонагӣ, матонату ҷасорат ва диловариву қаҳрамонӣ аст, ки наслҳои инсониятро дар ҳама давру замон ба зуҳури паҳлавонӣ, ҳифзи марзу буми хеш, дӯст доштан ва муҳофизати Ватан чун муқаддасоти бузурги инсонӣ ҳидоят кардааст.

Дар идома дар мавзуъҳои ««Шоҳнома»-и Фирдавсӣ ва суннати эҷоди силсиладостонҳо дар адабиёти форсу тоҷик», «Мақоми Дақиқӣ ва «Гуштоспнома»-и ӯ дар коргоҳи эҷодии Фирдавсӣ», «Ҷаҳоншумулии Фирдавсӣ дар «Шоҳнома»» ва «Шуҳрати ҷаҳонии Фирдавсӣ ва «Шоҳнома» –и ӯ» маърузаҳо пешниҳод шуданд.

Аз ҷониби ректори донишгоҳ пешниҳод гардид, ки дар муассисаҳои маърифатии ҳамаи зинаҳои таҳсил, шуруъ аз кӯдакистон то мактабҳои олӣ маҳфилҳои «Шоҳномахонӣ» ташкил шуда, дар асоси он озмуни ҷумҳуриявӣ низ баргузор карда шавад. Дар баробари ин, ректор масъалаи ҷорӣ намудани таълими «Шоҳнома»-ро дар мактабҳои таҳсилоти миёнаи умумӣ, донишкадаву донишгоҳҳои олии мамлакат ба сурати машғулияти иловагӣ, курсҳои махсус вобаста ба ниёзҳои риштаҳои таҳсил, нақши сарчашмавии ин ҳамосаи миллӣ дар бахшҳои адабиёт, забон, таърих, мардумшиносӣ, ҷуғрофиёи таърихӣ, фарҳанги миллӣ, фалсафа, ҷомеашиносӣ, ҳуқуқ ва амсоли ин мувофиқи мақсад дониста, дар амри оммавигардонии шоҳномахонӣ дар қаламрави ҷумҳурӣ ҳамчун самараи истиқболи самимонаи мардуми тоҷик аз ташаббуси нодири Пешвои миллат оид ба тақдими «Шоҳнома» ба ҳар хонадони мамлакат тадбири судманд маънидод намуд.

АКС: Донишгоҳи давлатии Хуҷанд

Май 18, 2024 13:29

Хабарҳои дигари ин бахш

Дар Институти астрофизика доир ба системаи офтобӣ машварат баргузор шуд
Барои кормандони соҳаи ҳифзи муҳити зист ва ҳифзи ҳуқуқ машғулияти омӯзишӣ баргузор гардид
Китоби «Рустами Эмомалӣ – дастпарвари Мактаби давлатдории Пешвои миллат» роҳнамо барои ҷавонони Тоҷикистон аст
«ШОҲНОМА» — БУЗУРГТАРИН ҲАМОСАИ МИЛЛӢ. Ин асар шоҳкории беназири сатҳи ҷаҳонӣ эътироф гардидааст
Аз қалъаи Бибихонуми шаҳри Бохтар бозёфтҳои давраҳои таърихӣ кашф карда шуданд
Оид ба тадбирҳои инноватсионӣ дар соҳаҳои молия, таҳсил ва иқтисод конференсияи байналмилалӣ доир шуд
Озмуни ҷумҳуриявии «Донандаи беҳтарини асарҳои Пешвои миллат» ҷамъбаст мегардад
Бозёфтҳои Осорхонаи таърихии асри санги Ховалинг 1 миллион сол умр доранд
ШАҲОМАТИ ДУШАНБЕ. Китоби «Рустами Эмомалӣ-дастпарвари Мактаби давлатдории Пешвои миллат» ин мавзуъро фаро гирифтааст
Дар ноҳияи Айнӣ бахшида ба 80-солагии муаллифи Суруди миллии Ҷумҳурии Тоҷикистон конференсияи ҷумҳуриявӣ доир мешавад
СОҲИБҚИРОНИ ШОИРӢ УСТОД РӮДАКИСТ. Бахшида ба Рӯзи Рӯдакӣ ҳамоиши адабӣ доир шуд
Ба ифтихори 700-солагии Ҳофизи Шерозӣ дар Осорхонаи миллӣ намоиши ҷашнӣ ифтитоҳ ёфт