Сафари расмии Вазири корҳои хориҷии Чин Ван И дар Ҷумҳурии Тоҷикистон анҷом ёфт

ДУШАНБЕ, 20.05.2024 /АМИТ «Ховар»/. 19 май сафари расмии узви Бюрои сиёсии Кумитаи Марказии Ҳизби Коммунистии Чин, роҳбари Дафтари Комиссияи корҳои хориҷии Кумитаи Марказии Ҳизби Коммунистии Чин, вазири корҳои хориҷии Ҷумҳурии Мардумии Чин Ван И дар Ҷумҳурии Тоҷикистон анҷом ёфт, хабар медиҳад АМИТ «Ховар».

Ёдовар мешавем, ки дар ҷараёни сафар Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Вазири корҳои хориҷии Чин Ван Иро ба ҳузур пазируфтанд.

Дар доираи сафар инчунин мулоқоту музокироти Ван И бо Вазири корҳои хориҷии Тоҷикистон Сироҷиддин Муҳриддин баргузор гардид.

Дар фарҷоми музокирот Барномаи ҳамкорӣ байни вазоратҳои корҳои хориҷии Ҷумҳурии Тоҷикистон ва Ҷумҳурии Мардумии Чин барои давраи солҳои 2025-2026 ба имзо расид.

Ҳамчунин Вазири корҳои хориҷии Ҷумҳурии Мардумии Чин дар Осорхонаи миллӣ бо таъриху тамаддуни куҳанбунёди халқи тоҷик шинос гардид.

Меҳмонон бо тамошои толорҳои намоишии Осорхонаи миллӣ аз ёдгориҳои нодири таърихӣ ва давраҳои пурифтихори таъриху фарҳанги пурғановати халқи тоҷик аз наздик шинос шуданд.

Ван И аз тамошои толорҳои намоишӣ изҳори хушҳолӣ намуда, таассуроташро дар китоби «Меҳмонони фахрӣ»-и Осорхонаи миллӣ навишт.

АКС: АМИТ «Ховар»/Осорхонаи миллии Тоҷикистон