ИҚДОМИ МОДАРОН. Бахшида ба Рӯзи Ваҳдати миллӣ онҳо ба дидорбинии сарҳадбонон рафтанд

ДУШАНБЕ, 19.06.2024 /АМИТ «Ховар»/. Як гурӯҳ занон- модарон дар шаҳри Исфара бахшида ба Рӯзи Ваҳдати миллӣ ба дидорбинии сарҳадбонон рафта, барои муҳофизони Ватан дастурхони идона густурданд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Исфара хабар доданд.

Иқдоми мазкур аз ҷониби шуъбаи занон ва оилаи мақомоти иҷроияи ҳокимияти давлатии шаҳр ташкил гардида, ҳадафи он дастгирии моддию маънавӣ ва таъмини ҳавасмандию руҳбаландсозии сарҳадбонон дар шаҳри Исфара мебошад.

Меҳмонон аз макони хизмату истироҳат, тамрингоҳҳо, анбори нигаҳдории маводи озуқа ва хобгоҳи ҳайати шахсии қисми низомӣ дидан намуда, бо шароити будубоши аскарон аз наздик шинос шуданд.

Ҳамзамон занони барнодил доир ба далерию шуҷоатмандии сарбозону афсарони тоҷик сари дастурхони идона андешаҳояшонро баён намуда, таъкид намуданд, ки ҳифзи марзу буми Ватан вазифаи ҷонӣ ва пуршараф барои ҳар як ҷавонмарди бонангу номус маҳсуб мешавад. Занони рӯзгордида соате бо аскарону афсарон ҳамнишин шудаву ҳамзамон бо арзи сипос барои хизмати шоистаашон онҳоро ба дӯстдории Ватан ва гиромидошти хоку марзу буми аҷдодӣ ҳидоят намуданд.

АКС: Мақомоти иҷроияи ҳокимияти давлатии шаҳри Исфара