Иштирокчиёни Форуми занони Тоҷикистон ва Қазоқистон Қалъаи Ҳисорро тамошо намуданд

ДУШАНБЕ, 02.08.2024 /АМИТ «Ховар»/. Ҳайати намояндагони Ҷумҳурии Қазоқистон 1 август пас аз анҷоми Форуми занони Тоҷикистон ва Қазоқистон баҳри тамошои мавзеъҳои таърихии Тоҷикистон ба шаҳри Ҳисор рафтанд.

Тавре мухбири АМИТ «Ховар» хабар медиҳад, меҳмонон Осорхонаи Қалъаи Ҳисорро тамошо карда, бо фарҳанги қадимии халқи тоҷик аз наздик шинос шуданд. Онҳо дар ин осорхона бо намунаи либосҳои мардонаву занонаи қадимии миллати тоҷик, асбоби рӯзгор ва дигар маҳсули ҳунарҳои мардумӣ шинос шуда, иброз доштанд, ки ин ёдгориҳо бозгӯи бо ҳам қаробат доштани урфу одат ва анъанаҳои миллатҳои Осиёи Марказӣ мебошанд.

Таъкид шуд, ки миллати тоҷик дорои тамаддуни ҷаҳонӣ буда, чеҳраҳои оламшумули он бо осору ҳунарҳои нодир дар пешрафти маданияти халқҳои гуногуни дунё нақши муҳим гузоштаанд.

Меҳмонон аз дидану шунидани таърихи ин мавзеъҳои таърихӣ-фарҳангӣ, табиати афсункор, ҳавои мусоид, меҳмоннавозии мардуми тоҷик ба ваҷд омада, ба давлату Ҳукумати мамлакат барои ҳифзи ёдгориҳои таърихӣ, рушди бесобиқаи соҳаҳои иқтисоди миллӣ, таъмини зиндагии шоистаи мардум таҳсин гуфта, дар китоби Ёддошти Осорхонаи таърихӣ андешаҳояшонро сабт намуданд.

Ҳамчунин ба меҳмонон аз ҷониби гурӯҳи ҳунармандони шаҳри Ҳисор барномаи фарҳангӣ пешниҳод гардид. Зимни он роҳбарияи Кумитаи кор бо занон ва оилаи назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии шаҳри Ҳисор ба меҳмонон аз номи Ҳукумати Ҷумҳурии Тоҷикистон рамзи миллии таърихиеро, ки бозгӯи бостонӣ будани шаҳри Ҳисор аст, дар фазои дӯстиву рафоқати ду миллати дӯст тақдим намуданд.

Ҳамчунин соҳибкорзанони ватанӣ ба меҳмонони форум армуғонҳои миллиро, ки аксаран ҳунарҳои дастӣ буданд, туҳфа намуданд.

Ёдовар мешавем, ки дар Форуми занони Тоҷикистон ва Қазоқистон, ки 1 август таҳти унвони «Занон, захираҳои молиявӣ ва ҳимоя аз зӯроварӣ» дар шаҳри Душанбе баргузор гардид, шахсони масъул оид ба тавонмандсозии ҳуқуқ ва имконияти занону духтарон, роҳбарони бонкҳои давлатӣ ва хусусӣ, намояндагони вазоратҳои корҳои дохилӣ, масъулон оид ба масъалаҳои пешгирии зӯроварӣ дар оила, намояндагони ташкилоти байналмилалӣ, олимон, ташкилоти ҷомеаи шаҳрвандӣ, соҳибкорзанон, ташкилот оид ба тавонмандсозии ҳуқуқ ва имконияти занону духтарони ҳарду давлат иштирок намуданд.

Бояд гуфт, ки ҳадафи аслии форум мубодилаи таҷрибаи пешқадам ва усулҳои амалияи муваффақ, коркарди лоиҳаҳо ва иқдоми муштарак мебошад, ки ба баланд бардоштани мавқеи занони ҳарду давлат равона гардида буд.

Моҳинави НАВРӮЗ,
АМИТ «Ховар»

АКС: Кумитаи кор бо занон ва оилаи назди Ҳукумати Ҷумҳурии Тоҷикистон