СОЛҲОИ РУШДИ САНОАТ. Дар Суғд шумораи корхонаҳои истеҳсолӣ афзоиш меёбад

ДУШАНБЕ, 12.09.2024. /АМИТ «Ховар»/. Бахшида ба Солҳои рушди саноат (2022-2026) дар шашмоҳаи якуми имсол дар шаҳри Хуҷанд 32 корхонаи хурду миёнаи истеҳсолии бо технологияҳои муосир муҷаҳҳаз сохта, ба истифода дода шуд. Дар ин давра корхонаҳои истеҳсолӣ бо 273 ҷойи кор ва бо ҷалби 35 миллион сомонӣ сармояи мустақим сохта, ба истифода дода шуданд. Ин нишондиҳандаҳо дар раванди саноатикунонии босуръати мамлакат саҳми босазо мегузоранд. Бахшида ба 35-солагии Истиқлоли давлатӣ дар шаҳру ноҳияҳои вилояти Суғд сохтмони иншооти ҷашнӣ идома дошта, барои сокинон ҷойи нави кор фароҳам оварда мешавад, хабар доданд ба АМИТ «Ховар» дар маркази матбуоти Раиси шаҳри Хуҷанд.

Дар шаҳри Хуҷанд ҳамчунин шумораи корхонаҳои истеҳсолкунандаи маҳсулоти ивазкунандаи воридот зиёд гардид. Дар шаш моҳи имсол аз ҷониби 104 корхонаи хурду калон ба маблағи 403,1 миллион сомонӣ маҳсулот истеҳсол гардид, ки нисбат ба ҳамин давраи соли 2023 9,2 фоиз зиёд аст.

Корхонаи коркарди мева ва сабзавоти Ҷамъияти дорои масъулияти маҳдуди «Дороинвест»-и шаҳри Хуҷанд бо мақсади саҳмгузорӣ дар саноатикунонии мамлакат сохта шуда, дар он меваю сабзавот коркард ва басту банд мешавад.

Корҳои асосии сохтмон ба итмом расидаанд. Воридсозии дастгоҳҳои муосир ва ба кор андохтани корхона имкон медиҳад, ки шаҳрвандон бо ҷойи кор таъмин гарданд.

Дар партави дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон дар вилоят ба бунёди корхонаи нав ва фаъолсозии хатҳои нави истеҳсолӣ диққати махсус дода мешавад. Дар ин раванд масъулинро зарур аст, ки барои сифатнок ва дар муҳлати муқарраргардида ба кор андохтани ин корхона талош намоянд.

Корхонаи воҳиди давлатии «Садаф», ки дар шаҳри Хуҷанд ба истеҳсоли рахти хоб, равған ва консерва машғул аст, дар рушди саноати мамлакат саҳм мегузорад. Корхона соли 1979 таъсис ёфта, дар оғоз аз коргоҳҳои металлгудозӣ, механикӣ, инструменталӣ, механикӣ-электронӣ, ҷамъу васлкунӣ ва амсоли он иборат буд. Ҳоло дар ҳудуди он коргоҳҳои хурду бузург таъсис ёфта, фаъолият пеш мебаранд. Имсол корхона бо мақсади таъмини сокинони маҳаллаи Чашма бо оби нӯшокӣ ба масофаи 10 километр хати об кашида, барои 10 ҳазор шаҳрванд оби нӯшокӣ дастрас намуд.

Дар доираи Солҳои рушди саноат (2022-2026) ва бо мақсади татбиқи супоришҳои Пешвои миллат муҳтарам Эмомалӣ Раҳмон дар самти саноатикунонии босуръати мамлакат масъулинро зарур аст, ки барои фаъол гардонидани хатҳои нави истеҳсолӣ тадбир андешанд.

АКС: маркази матбуоти Раиси шаҳри Хуҷанд