Дастаи «Хатлон-2» соҳиби «Ҷоми Ҳизби Халқии Демократии Тоҷикистон» гардид

ДУШАНБЕ, 08.09.2024 /АМИТ «Ховар»/. 7 сентябр дастаи «Хатлон-2» бо мағлуб кардани дастаи НБО-и «Роғун» соҳиби «Ҷоми Ҳизби Халқии Демократии Тоҷикистон» ва мукофотпулӣ шуд. Дар ин хусус ба АМИТ «Ховар» дар дастгоҳи Кумитаи Иҷроияи Марказии Ҳизби Халқии Демократии Тоҷикистон хабар доданд.

Дар доираи нақшаи чорабиниҳои ҷашнии Кумитаи Иҷроияи Марказии Ҳизби Халқии Демократии Тоҷикистон бахшида ба 33-солагии Истиқлоли давлатӣ ва 30-солагии таъсисёбии ҳизб дар ҳамкорӣ бо Кумитаи кор бо ҷавонон ва варзиш ва Федератсияи футболи Тоҷикистон даври ҷумҳуриявии мусобиқаи футболи хурд барои дарёфти «Ҷоми Ҳизби Халқии Демократии Тоҷикистон» байни дастаҳои футболи ғайрикасбии шаҳру ноҳияҳои мамлакат баргузор гардид.

Марҳилаи ниҳоии мусобиқа 6 сентябр бо иштироки дастаҳои ғолиби Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе, минтақаи Рашт, водии Ҳисор ва НБО-и «Роғун» оғоз ёфт.

Дар асоси низомнома 8 даста дар ду гурӯҳ – «А» ва «Б» байни ҳам рақобат карданд.

Дар гурӯҳи «А» дастаи НБО-и «Роғун» бо касби 7 имтиёз ва дастаи «Ҳисор» бо 6 имтиёз ба даври баъдӣ роҳ ёфтанд. Дар гурӯҳи «Б» дастаи «Хатлон-2» бо касби 9 имтиёз ва дастаи «Душанбе» бо 6 имтиёз аз гурӯҳ баромаданд.

Тибқи низомнома, дастаҳое, ки дар гурӯҳҳо зинаи аввалро соҳиб шуданд, барои ҷойҳои якуму дуюм ва дастаҳое, ки дар гурӯҳҳо зинаи дуюмро ишғол намуданд, барои мақоми сеюм рақобат карданд.

Дар натиҷа дастаи «Хатлон-2» дастаи НБО-и «Роғун»-ро бо ҳисоби 2-1 шикаст дода, соҳиби «Ҷоми Ҳизби Халқии Демократии Тоҷикистон» ва 10 ҳазор сомонӣ мукофотпулӣ шуд.

Дастаи НБО-и «Роғун» бо касби зинаи дуюми мусобиқа медалҳои нуқраро ба даст оварда, бо 7500 сомонӣ мукофотпулӣ қадрдонӣ гардид.

Дастаҳои «Душанбе» ва «Ҳисор» барои касби зинаи сеюми «Ҷоми Ҳизби Халқии Демократии Тоҷикистон» ба майдон баромаданд. Вақти асосии ин дидор бо ҳисоби 2-2 ба поён расид. Дар натиҷаи силсилаи зарбаҳои ҷаримавӣ футболбозони дастаи «Душанбе» бо ҳисоби 2 бар 1 пирӯз шуда, медалҳои биринҷии мусобиқаро ба гардан овехтанд ва соҳиби 5000 ҳазор сомонӣ мукофотпулӣ шуданд.

«Ҷоми Ҳизби Халқии Демократии Тоҷикистон»-ро муовини якуми Раиси Ҳизби Халқии Демократии Тоҷикистон Абдуҷаббор Азизӣ ба ғолибон тақдим намуд.

Инчунин, дар ҷамъбасти мусобиқа аз ҷониби Кумитаи тадорукот ба дастаҳои иштирокчӣ ва беҳтаринҳои мусобиқа туҳфаҳои хотиравӣ, инчунин ба шахсони масъул, ки дар баргузории чорабинии мазкур саҳми назаррас доштанд, сипосномаҳо супорида шуданд.

Ёдовар мешавем, ки мусобиқаи ҷумҳуриявии футбол барои дарёфти «Ҷоми Ҳизби Халқии Демократии Тоҷикистон» аз соли 2020 инҷониб бо ибтикори Кумитаи Иҷроияи Марказии Ҳизби Халқии Демократии Тоҷикистон баргузор карда мешавад.

АКС: Дастгоҳи Кумитаи Иҷроияи Марказии Ҳизби Халқии Демократии