Дар Душанбе Конфронси 9-уми ҷаҳонӣ оид ба ҳайвоноти ҷуфтсуми кӯҳӣ доир шуд

ДУШАНБЕ, 15.10.2024 /АМИТ «Ховар»/. Дар шаҳри Душанбе Конфронси 9-уми ҷаҳонӣ оид ба ҳайвоноти ҷуфтсуми кӯҳӣ дар ҳамкорӣ бо Иттиҳоди байналмилалии ҳифзи табиат баргузор гардид, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Дар конфронси ҷаҳонӣ олимон, экологҳо, мутахассисони соҳа ва ҷонибҳои манфиатдор аз 20 давлати дунё, аз ҷумла Амрико, Ҳиндустон, Испания, Чин, Муғулистон, Русия, Непал, Туркия, Канада, Фаронса ва ғайра масъалаҳои мубрами марбут ба ҳифзи ҳайвоноти ҷуфтсӯми кӯҳиро баррасӣ намуданд.

Конфронси ҷаҳонӣ барои табодули дониш, муҳокимаи натиҷаҳои таҳқиқот ва таҳияи стратегияҳо барои ҳифз ва идоракунии устувори ҳайвоноти ҷуфтсуми кӯҳӣ ва экосистемаҳои онҳо замина фароҳам меорад. Дар конфронс гуфта шуд, ки ҳайвоноти ҷуфтсуми кӯҳӣ, ки дар нигоҳ доштани мувозинати экологии экосистемаҳои кӯҳӣ нақши муҳим доранд, бо таҳдидҳои афзоянда, аз қабили аз байн рафтани макони зист, тағйирёбии иқлим, шикори ғайриқонунӣ ва низоъҳои ҳайвоноти ваҳшӣ рӯ ба рӯ мешаванд.

Ҳадафи конфронс ба ҳалли ин мушкилот тавассути ҳамкории олимон, табиатшиносон ва сиёсатмадорон барои эҷоди стратегияҳои инноватсионӣ ва устувори ҳифзи табиат равона гардидааст. Дар конфронси ҷаҳонӣ доираи васеи мавзуъҳои марбут ба ҳифзи ҳайвоноти ҷуфтсуми кӯҳӣ, аз ҷумла омӯзиши таъсири мутақобили экологии онҳо, динамикаи дарранда, сайд ва мутобиқшавӣ ба тағйирёбии муҳити зист баррасӣ гардид.

Таъкид шуд, ки тавассути ҳамкории байналмилалӣ конфронс имкон дорад дар таҳияи стратегияҳои глобалии ҳифзи табиат, ки метавонанд барои ҳифзи ҳайвоноти ҷуфтсуми кӯҳӣ дар саросари ҷаҳон татбиқ карда шаванд, нақши бориз гузорад. Барои таҳкими чораҳои муҳофизатӣ ва баланд бардоштани огоҳии ҷомеа дар бораи аҳамияти ҳифзи ҳайвоноти ҷуфтсуми кӯҳӣ ҳамкорӣ бояд тақвият ёбад.

Ёдовар мешавем, ки Конфронси 8-уми ҷаҳонӣ оид ба ҳайвоноти ҷуфтсуми кӯҳӣ соли 2022 дар парки миллии Гран-Парадисои давлати Италия баргузор гашта буд.

Аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон барои иштирокдорони конфронс таҳти унвони «Шомгоҳони Душанбе» сайругашт ташкил карда шуд. Зимни сайри шомгоҳӣ ба меҳмонон ҷойҳои ҷолиб ва таърихии шаҳри Душанбе, аз қабили майдони Исмоили Сомонӣ, Боғи ба номи А.Рӯдакӣ, чойхонаи «Роҳат», «Наврӯзгоҳ» ва дигар биноҳои таърихию фарҳангӣ муаррифӣ шуданд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон