Дар корхонаи «Дион-ангишт-Тоҷикистон» таҷҳизоти нави ангиштканӣ насб мегардад

ДУШАНБЕ, 08.10.2024. /АМИТ «Ховар»/. Дар Ҷамъияти дорои масъулияти маҳдуди «Дион – ангишт- Тоҷикистон», ки ба истеҳсоли ангишт дар кони Моғиёни шаҳри Панҷакент машғул аст, хати нави истеҳсолӣ бо насби таҷҳизоти нав сохта мешавад. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Панҷакент хабар доданд.

Иттилоъ дода шуд, ки аз Ҷумҳурии Мардумии Чин комбайнҳои ангиштканӣ, хати интиқоли ангишт, мошини борбардор, пойгоҳи барқӣ ва дигар таҷҳизот ворид карда шуда, дар айни замон насби онҳо идома дорад.

Баъди насби ин таҷҳизот истеҳсоли ангишт назар ба имрӯз чанд маротиба афзуда, қариб ба сад ҳазор тонна расонида мешавад.

Ангишти истеҳсолшуда дар дохили шаҳр фурӯхта шуда, тибқи шартнома, ба хориҷи мамлакат низ содирот мешавад.

Корхонаҳои саноатии мамлакат барои афзоиш додани ҳаҷми истихроҷи ангишт ва коркарди он, таъминоти саривақтии соҳаҳои иқтисодиёт ва иҷтимоиёти ҷумҳурӣ бо ангишт, афзоиши ҳаҷми содирот ва истифодаи бештари иқтидор кӯшиш менамоянд.

Бо ин дар рушди иқтисодиёти миллӣ дар доираи Солҳои рушди саноат (2022-2026) ва татбиқи яке аз чор ҳадафи стратегӣ- саноатикунонии босуръати мамлакат саҳми арзанда мегузоранд.

АКС: Мақомоти иҷроияи ҳокимияти давлатии шаҳри Панҷакент