35-СОЛАГИИ ИСТИҚЛОЛИЯТИ ДАВЛАТӢ. Аз 950 иншооти ҷашнӣ дар Хуҷанд 600 адади он бунёд гардидааст

ДУШАНБЕ, 13.11.2024. /АМИТ «Ховар»/. Бахшида ба 35-солагии Истиқлолияти давлатии Ҷумҳурии Тоҷикистон дар шаҳри Хуҷанд бунёду навсозии беш аз 950 иншооти соҳаҳои гуногун ба нақша гирифта шудааст. То имрӯз зиёда аз 600 адади он бунёд гардидааст. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Хуҷанд хабар доданд.

Сохтмони бинои нави таълимии факултети №4 Академияи Вазорати корҳои дохилӣ дар шаҳри Хуҷанд идома дошта, дар он тамоми инфрасохтори зарурӣ ба нақша гирифта шудааст.

Дар ин бино ошхона, хобгоҳ, 17 синфхонаи таълимӣ, маҷлисгоҳ барои 500 нафар ва утоқҳои корӣ сохта мешаванд.

Ҳамчунин дар маҳаллаи «Ваҳдат»-и шаҳри Хуҷанд бинои нави Суди вилояти Суғд пешбинӣ гардидааст.

Ин бино аз 7 ошёна иборат буда, дар он ҳуҷраҳои корӣ, маҷлисгоҳ, ошхона ва дигар шароити зарурӣ барои кормандони мақомоти Суди вилоят фароҳам оварда мешавад.

Лоиҳаи иншоот мутобиқ ба талаботи замон таҳия гардида, он бо истифода аз масолеҳи сохтмонии ватанӣ бо сифати баланд ва дар муҳлати муайянгардида бунёд мегардад.

Ҳамчунин бинои нави Кумитаи иҷроияи Ҳизби Халқии Демократии Тоҷикистон дар вилоят ва шаҳри Хуҷанд аз 7 ошёна иборат буда, пудратчии он ширкати «Бунёд-1» мебошад.

Дар шаҳри Хуҷанд ба пешвози ин ҷашни фархундаи миллӣ ободонию созандагӣ, сабзазор ва гулзоркунӣ вусъат меёбад. Дар ин кор соҳибкорону аҳолӣ низ саҳми муносиб гузошта, дар ҳар мавзеи шаҳр дарахтони ороишию мевадиҳанда ва ҳамешасабз, инчунин гулҳои ҳархелаи ороишию маҳаллӣ шинонидаанд, ки ба атроф зебу зиннат мебахшанд.

АКС: Мақомоти иҷроияи ҳокимияти давлатии шаҳри Хуҷанд