Аз вилояти Хатлон зиёда аз 40 намуд маҳсулот содирот мешавад

ДУШАНБЕ, 13.11.2024. /АМИТ «Ховар»/. Аз вилояти Хатлон ҳамасола ба беш аз 10 давлати хориҷи мамлакат зиёда аз 40 намуд маҳсулот содирот мешавад. Дар ин хусус ба АМИТ «Ховар» дар хадамоти матбуоти Раиси вилояти Хатлон иттилоъ доданд.

Дар ин давра ба воситаи гумруки вилояти Хатлон ба миқдори 16 ҳазору 96 тонна маҳсулоти кишоварзӣ содирот шудааст, ки 8 ҳазору 639 тоннаи онро пиёз, 258 тоннаро карам, 480 тоннаро лаблабу, 52 тоннаро кадуи сабз, 1 ҳазору 277 тоннаро писта, 40 тоннаро чормағзи заминӣ, 700 тоннаро ангур, 8,6 тоннаро сирпиёз, 572 тоннаро зардолу, 402 тоннаро тарбуз, 6 тоннаро харбуза, 52 тоннаро себ, 95,7 тоннаро шафтолу, 498 тоннаро тухми офтобпараст, 2281 тоннаро олу, 4 тоннаро лимӯ, 17,5 тоннаро қаламфур, 24 тоннаро нок ва 685 тоннаро меваи хушк (чормағз) ва 16 тоннаро мағзи писта ташкил медиҳад.

Маҳсулоти кишоварзӣ асосан ба Покистон беш аз 6 ҳазор тонна, Қазоқистон зиёда аз 3 ҳазор тонна, Русия беш аз 3 ҳазор тонна, Узбекистон 773 тонна ва Беларус 76 тонна содирот шудааст.

Инчунин аз вилояти Хатлон ба хориҷи мамлакат 296 ҳазору 389 тонна семент, 42 ҳазору 596 тонна нахи пахта, 2 ҳазору 604 тонна нуриҳои минералӣ, 7 ҳазору 46 тонна калобаи ресандагӣ ва 788 тонна гаҷкартон содирот гардидааст.

Ёдовар мешавем, ки вилояти Хатлон бо беш аз 50 давлати хориҷи дуру наздик робитаи тиҷоратию иқтисодӣ барқарор намуда, ба вилоят аз 30 давлат сармоя ҷалб гардидааст.

АКС: АМИТ «Ховар»