Дар деҳаи Шодмонқалъаи шаҳри Ваҳдат бинои нави муассисаи таълимӣ ба истифода дода шуд

ВАҲДАТ, 03.11.2024. /АМИТ «Ховар»/. Ба ифтихори ҷашни 35-солагии Истиқлоли давлатии Ҷумҳурии Тоҷикистон дар деҳаи Шодмонқалъаи Ҷамоати деҳоти Симиганҷи шаҳри Ваҳдат бинои нави Муассисаи таҳсилоти миёнаи умумии №61 мавриди истифода қарор дода шуд. Дар ин хусус ба хабарнигори АМИТ «Ховар» Субҳониддини Маҳмуд дар Мақомоти иҷроияи ҳокимияти давлатии шаҳри Ваҳдат хабар доданд.

Бинои кӯҳнаи муассиса аз замони пешин боқӣ монда, норасоии ҷойи нишаст яке аз мушкилоти асосии ин мактаб ба ҳисоб мерафт. Хушбахтона, зери сиёсати хирадмандонаи Пешвои миллат муҳтарам Эмомалӣ Раҳмон бинои нави муассисаи таълимӣ иборат аз ду ошёна ва 16 синфхона барои 480 хонанда дар як баст сохта шуд. Бино бо дастгирии молиявии собиқ хонандагони муассиса ва дастгирии сокинону соҳибкорон ба маблағи ду миллион сомонӣ сохта шуд. Он ҳамчунин бо таҷҳизоту аёнияти дарсӣ ва мизу курсии нав таъмин мебошад.

Сокинони шаҳри Ваҳдат сиёсати хирадмандонаи Пешвои миллат муҳтарам Эмомалӣ Раҳмонро дастгирӣ намуда, барои ободии муассисаҳои таълимӣ, бунгоҳу марказҳои саломатии деҳот ва мумфаршнамоии роҳҳои деҳаю маҳаллаҳо кӯшиш доранд. Зеро хуб медонанд, ки ободии Ватан аз ободии ҳар гӯшаи он оғоз меёбад.

АКС: Мақомоти иҷроияи ҳокимияти давлатии шаҳри Ваҳдат