Дар шаҳри Будваи Черногория масъалаи коҳиш додани хатари офатҳои табиӣ баррасӣ гардид
ДУШАНБЕ, 08.11.2024. /АМИТ «Ховар»/. Ҳайати Ҷумҳурии Тоҷикистон таҳти роҳбарии Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Рустам Назарзода дар нишасти вазирон таҳти унвони «Тадбирҳо оид ба коҳиш додани хатари офатҳои табиӣ дар пасманзари хавфҳои тағйирёбанда», ки дар доираи Платформаи минтақавии Аврупо ва Осиёи Марказӣ вобаста ба коҳиши хатари офатҳои табиӣ (ECARRDS-2024) дар шаҳри Будваи Черногория доир шуд, иштирок намуд. Дар ин хусус ба АМИТ «Ховар» дар Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар доданд.
Дар нишаст масъалаҳои марбут ба татбиқи барномаи қолабии Сендай, маблағгузории хатари офатҳои табиӣ ва иқлимӣ, ҷалби ҳамаҷонибаи тарафҳои манфиатдор бо мақсади пешгирӣ ва рафъи оқибатҳои ҳолатҳои фавқулода, табодули иттилоот оид ба ҳолатҳои фавқулода, баланд бардоштани иқтидору таъминоти моддию техникии давлатҳои аъзо ва расонидани кумак ба аҳолии аз офатҳои табиӣ зарардида баррасӣ гардид.
Раиси Кумитаи ҳолатҳои фавқулода ва мудофиаи граждании Тоҷикистон Рустам Назарзода дар ҷаласа иброз дошт, ки Президенти Ҷумҳурии Тоҷикистон муҳтарам Эмомалӣ Раҳмон борҳо даъват ба амал овардаанд, ки ҷомеаи ҷаҳонро зарур аст барои ҳалли мушкилоти экологӣ тадбирҳои муштаракро таҳия ва сари вақт амалӣ созад.
«Эълон намудани соли 2003 — Соли оби тоза, солҳои 2005-2015 Даҳсолаи байналмилалии амал «Об барои ҳаёт», соли 2013- Соли байналмилалии ҳамкорӣ дар соҳаи об, солҳои 2018-2028- Даҳсолаи байналмилалии амал «Об барои рушди устувор», соли 2025- Соли байналмилалии ҳифзи пиряхҳо аз ҷумлаи ташаббус ва пешниҳодҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон мебошанд, ки давлатҳои аъзои Созмони Милали Муттаҳид онро дастгирӣ намуданд»,- ёдоварӣ гардид дар нишасти вазирон доир ба «Тадбирҳо оид ба коҳиш додани хатари офатҳои табиӣ дар пасманзари хавфҳои тағйирёбанда».
Инчунин дар доираи нишаст Рустам Назарзода бо намояндаи Дабири кулли Созмони Милали Муттаҳид оид ба коҳиши хатари офатҳои табиӣ Камол Кишор ва роҳбари Дафтари минтақавии Дафтари Созмони Милали Муттаҳид вобаста ба офатҳои табиӣ дар Аврупо ва Осиёи Марказӣ Наталя Алонсо вохӯрӣ намуд.
Ҷонибҳо барои фаъолияти муштарак ва саҳмгузорӣ дар самти пешгирӣ ва рафъи оқибатҳои офатҳои табиӣ ибрози назар намуда, барои ҳамкории байналмилалӣ дар ин самт якчанд пешниҳод манзур намуданд.
Ёдовар мешавем, ки нишасти вазирон аз 6 то 8 ноябр идома меёбад. Дар назар аст, ки имрӯз масъалаҳои ҳамкории мутақобили давлатҳои аъзо дар самти пешгирӣ ва рафъи оқибатҳои офатҳои табиӣ баррасӣ гарданд.
АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон
Дар Душанбе Форуми ёздаҳуми миллӣ оид ба волоияти қонун доир мешавад
Вазири меҳнат, муҳоҷират ва шуғли аҳолии Тоҷикистон дар Давҳа бо роҳбари ширкати қатарии «Jusour» мулоқот намуд
Дар Маркази ҷумҳуриявии илмии ҷарроҳии дилу рагҳо шуъбаи ҷарроҳии бариатрикӣ ва герниологӣ пас аз таъмиру азнавсозӣ ба истифода дода шуд
Ҳамкории Тоҷикистону Қатар дар самти меҳнат ва шуғли аҳолӣ тақвият меёбад
Намояндаи Тоҷикистон дар Конфронси шашуми вазирони меҳнати кишварҳои аъзои СҲИ иштирок намуд
КУМАКҲОИ УНВОНИИ ИҶТИМОӢ. Ба қишри осебпазири Тоҷикистон беш аз 917 миллион сомонӣ кумак расонида шуд
Дар Давҳа масъалаи омодасозии мутахассисон барои бозори меҳнат баррасӣ шуд
Дар Душанбе форуми минтақавӣ-ҷаласаи роҳбарони сохторҳои ҳолатҳои фавқулода аз давлатҳои Осиёи Марказӣ идома дорад
Дар Тоҷикистон ҷарроҳии мураккаби мағзи сар гузаронида шуд
Дурнамои рушди соҳаи таҳсилоти ибтидоӣ ва миёнаи касбӣ дар Тоҷикистон бо намояндагони Ассотсиатсияи кумак ва ёрии Ҷопон баррасӣ гардид
Ҳайати ҳокимияти судии Тоҷикистон дар Женева дар форуми байналмилалӣ иштирок намуд
«СОЛИМИИ ЗАН — СОЛИМИИ МИЛЛАТ». Дар шаҳри Гулистон беш аз 200 нафар занон бо муоинаи ройгон фаро гирифта шуданд
