АМИТ «Ховар» барои риояи бандҳои «Меъёрҳои ахлоқии фаъолияти журналистӣ дар Тоҷикистон» беҳтарин дониста шуд

ДУШАНБЕ, 13.12.2024. /АМИТ «Ховар»/. Имрӯз дар ҷаласаи солонаи Шурои ВАО-и Тоҷикистон Агентии миллии иттилоотии Тоҷикистон «Ховар» барои риояи бандҳои «Меъёрҳои ахлоқии фаъолияти журналистӣ дар Тоҷикистон» аз ҷумлаи беҳтаринҳо дониста шуд.

Тавре мухбири АМИТ «Ховар» хабар медиҳад,  ин мониторинг байни  ҳафтаномаҳои мамлакат  ва  сомонаҳои иттилоотӣ  гузаронида шуд.

Иброз гардид, ки мақсад аз баргузор намудани мониторинг муайян намудани ҳолатҳои вайронкунии меъёрҳои ахлоқи касбӣ дар нашрияҳою сомонаҳои интернетии мамлакат, пешниҳоди тавсияҳо барои бартарафсозии камбудиҳои ҷойдошта ва пешгирӣ аз эҳтимоли баҳсҳои судӣ байни рӯзноманигорон ва шахсони ҳуқуқию воқеӣ мебошад.

«Таҳлилҳо нишон доданд, ки бархе нашрияҳо ба ҳисоби миёна дар 5 моҳ 14 маротиба ва дар 1 моҳ тақрибан се маротиба бандҳои гуногуни «Меъёрҳои ахлоқии фаъолияти журналистӣ дар Тоҷикистон»-ро  риоя  накардаанд.

Дар баробари ин нашрияҳое низ ҳастанд, ки бинобар касбияти баланд пайваста мутобиқ ба  «Меъёрҳои ахлоқии фаъолияти журналистӣ дар Тоҷикистон» амал менамоянд.

Беҳтаринҳо бо Сипоснома ва туҳфаи хотиравӣ қадрдонӣ гардиданд.

АКС аз манбаъҳои боз