Хуруҷи коронавируси нави COVID-Omicron XBB дар Тоҷикистон асоси воқеӣ надорад

ДУШАНБЕ, 18.01.2025 /АМИТ «Ховар»/. Хуруҷи коронавируси нави COVID-Omicron XBB  дар Тоҷикистон асоси воқеӣ надорад. Дар ин хусус АМИТ «Ховар» бо истинод ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар медиҳад.

Имрӯзҳо дар шабакаҳои иҷтимоӣ ва сомонаҳои интернетӣ, аз ҷумла «WhatsApp» ва «Telegram» матни тавсияномае аз номи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон оид ба хуруҷи навъи нави коронавируси COVID-Omicron XBB  дар Тоҷикистон паҳн мегардад.

Вобаста ба ин Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба таваҷҷуҳи шаҳрвандони мамлакат мерасонад, ки маводи мазкур ҳеҷ алоқамандие ба вазорат надошта, он аз номи саҳифаҳои сохта ё ба ибораи дигар «фейк» нашру пахш карда мешавад.

Аз ин лиҳоз, вазорат аз тамоми сокинони мамлакат даъват менамояд, ки ба ҳар гуна хабару овозаҳои бардурӯғ вобаста ба  хуруҷи сирояти мазкур, ки гӯё дар Тоҷикистон ба қайд гирифта шудааст, бовар накунанд.

АКС аз бойгонӣ