Таҳкими ҳамкории Тоҷикистон бо Иттиҳоди Аврупо дар соҳаи энергетика дар Душанбе баррасӣ гардид

ДУШАНБЕ, 13.02.2025 /АМИТ «Ховар»/. Маҷмуи ҳамкории дуҷониба дар соҳаи энергетика ва захираҳои об дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо Роҳбари бахши ҳамкории Дафтари Иттиҳоди Аврупо дар Душанбе хонум Изабел Уриз Эрнандес баррасӣ гардид, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Дар мулоқот гуфта шуд, ки Тоҷикистон ҳамчун давлати дорои захираҳои фаровони гидроэнергетикӣ ба татбиқи лоиҳаҳои бузург дар соҳаи энергетика таваҷҷуҳи махсус зоҳир менамояд. Дар ин замина аҳамияти тақвияти ҳамкорӣ дар самти амалӣ намудани лоиҳаҳои соҳаи энергетика, аз ҷумла самаранокии энергия ва рушди манбаъҳои барқароршавандаи энергия ва коҳиш додани талафоти неруи барқ таъкид гардид.

Бо қаноатмандӣ иброз гашт, ки муносибатҳои дуҷониба минбаъд низ густариш ва тақвият хоҳанд ёфт.

АКС: Вазорати энергетика ва захираҳои оби Ҷумҳурии Тоҷикистон