Ҳамкории Тоҷикистон ва Бонки Осиёии рушд оид ба рушди инноватсия ва технологияҳои рақамӣ таҳким меёбад

ДУШАНБЕ, 03.03.2025 /АМИТ «Ховар»/. Таҳкими ҳамкорӣ дар соҳаи инноватсия байни Тоҷикистон ва Бонки Осиёии рушд дар мулоқоти Директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо бо намояндаи доимии Бонки Осиёии рушд дар Тоҷикистон Ко Сакамото баррасӣ гардид. Дар ин хусус АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад.

Дар мулоқот таъкид шуд, ки Бонки Осиёии рушд таҳияи «Стратегияи ҳамкорӣ бо Тоҷикистон барои солҳои 2026-2030»-ро идома медиҳад. Дар ин замина пешниҳод гардид, ки рушди соҳаи инноватсия ва технологияҳои рақамӣ дар Тоҷикистон ҳамчун ҷузъи муҳими ин стратегия пешбинӣ шавад.

Ҳамзамон мусоҳибон аҳамияти ҷалби сармоягузории хориҷӣ, тавсеаи ҳамкорӣ ва татбиқи таҷрибаи пешрафтаи байналмилалиро дар ин самт таъкид намуданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон