Дар Донишгоҳи миллӣ оид ба пешоҳангии Тоҷикистон дар ҳифзи пиряхҳо ҳамоиш доир шуд

ДУШАНБЕ, 18.03.2025 /АМИТ «Ховар»/. Дар маҳфили «Паҳно»-и Донишгоҳи миллии Тоҷикистон бахшида ба Рӯзи байналмилалии ҳифзи пиряхҳо таҳти унвони «Тоҷикистон-пешоҳанги масоили ҳифзи пиряхҳо дар ҷаҳон» ҳамоиш доир гардид. Дар ин хусус ба АМИТ «Ховар» аз ин донишгоҳ хабар доданд.

Дар маҳфил сарходими Муассисаи давлатии илмии «Маркази омӯзиши пиряхҳо»-и Академияи миллии илмҳои Тоҷикистон профессор Абдулҳамид Қаюмов доир ба марҳилаҳои омӯзиши пиряхҳо, бахусус анҷом додани экспедитсия дар Антарктида, натиҷаҳои илмии бадастомада, ҳамчунин дар амал татбиқ намудани донишҳои мавҷуда дар масъалаи ҳифзи пиряхҳо тавассути навори видеоӣ ва слайдҳои мушаххас маълумоти муфиду ҷолиб пешниҳод намуд.

Абдулҳамид Қаюмов аз саҳми назарраси Тоҷикистон дар баррасии масъалаи обу иқлим ва ҳифзи пиряхҳо ёдовар шуд. Иброз гардид, ки дар Тоҷикистон бо роҳбарии Пешвои миллат муҳтарам Эмомалӣ Раҳмон соли 2017 дар назди Академияи миллии илмҳои Тоҷикистон Муассисаи давлатии илмии «Маркази омӯзиши пиряхҳо»-ро таъсис ёфт. «Маҳз натиҷаи таваҷҷуҳи Президенти Тоҷикистон ва сиёсати пешгирифтаи Ҳукумати мамлакат дар масъалаи ҳифзи пиряхҳо буд, ки дар Тоҷикистон 6 стансияи омӯзиши пиряхҳо таъсис дода шуд»,- изҳор дошт профессор.

Гуфта шуд, ки ташаббусҳои ҷаҳонии татбиқшудаи ҷониби Тоҷикистон оид ба масоили об, ба монанди «Соли оби тоза» (соли 2003), Даҳсолаи амалиёти «Об барои ҳаёт» (солҳои 2005-2015), «Дипломатияи об ё риштаи ҳамкорӣ дар масоили об» (соли 2013) ва Даҳсолаи байналмилалии амал «Об барои рушди устувор, солҳои 2018-2028», ки мавриди амал қарор дорад, далели возеҳи нуфузу эътибори ҷаҳонии Пешвои миллати тоҷик муҳтарам Эмомалӣ Раҳмон ва муҳимияти масоили баррасишаванда мебошанд.

Ёдовар мешавем, ки 14 декабри соли 2022 Маҷмаи Умумии Созмони Милали Муттаҳид (СММ) зимни иҷлосияи 77-ум қатънома дар бораи эълон намудани соли 2025 Соли байналмилалии ҳифзи пиряхҳоро, ки аз ҷониби Ҷумҳурии Тоҷикистон пешбарӣ шуда буд, якдилона қабул намуд. Ин ташаббуси панҷуми Президенти Ҷумҳурии Тоҷикистон муҳтарам Эмомалӣ Раҳмонро 153 давлати аъзои ин созмон ҷонибдорӣ намуд. Дар асоси он 29-31 майи соли равон дар Тоҷикистон бо тасмими Созмони Милали Муттаҳид конфронси байналмилалӣ доир ба ин мавзуъ баргузор мешавад.

АКС: Донишгоҳи миллии Тоҷикистон