Дар Душанбе масъалаҳои соҳаи гематология баррасӣ шуданд

ДУШАНБЕ, 04.03.2025. /АМИТ «Ховар»/. 3 март ҷаласаи гурӯҳи экспертии таҳияи лоиҳаи Низомномаи ташкилоти заминавии кишварҳои иштирокчии Иттиҳоди Давлатҳои Мустақил дар соҳаи гематология ба тариқи маҷозӣ доир гардид. Дар ин хусус ба АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ доданд.

Дар ҷаласа намояндагони соҳаи тандурустӣ аз ҷумҳуриҳои Тоҷикистон, Арманистон, Беларус, Қазоқистон, Қирғизистон, Федератсияи Русия ва кормандони Кумитаи иҷроияи Иттиҳоди Давлатҳои Мустақил масъалаҳои пешниҳоду эродҳо ба Низомномаи ташкилоти заминавиро баррасӣ намуданд.

Гуфта шуд, ки гематология омӯзиши хун дар бораи саломатӣ ва беморӣ мебошад. Мушкилот бо мағзи устухон, ки аксарияти ҳуҷайраҳои хуни баданро тавлид менамояд, баъзан метавонад сабаби бемориҳои хун гардад. Соҳаи гематология мекӯшад сабабҳои ин мушкилот, таъсири онҳо ба саломатии инсон ва пайдо намудани ҳалли ин масъаларо дарк намояд.

Гематологҳо чунин шароит, ба монанди камхунӣ, лейкемия, ихтилоли лахташавӣ ва саратони хунро ташхис ва табобат менамоянд.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон