ДАРАХТ БИНШОН! Дар маҳаллаи «Зафар»-и шаҳри Душанбе беш аз 4 000 бех ниҳоли ороишӣ ва мевадиҳанда шинонида шуд

ДУШАНБЕ, 13.03.2025 /АМИТ «Ховар»/. Дар маҳаллаи «Зафар»-и ноҳияи Синои шаҳри Душанбе бо ташаббуси Донишгоҳи байналмилалии сайёҳӣ ва соҳибкории Тоҷикистон беш аз 4 000 бех ниҳоли ороишӣ ва мевадиҳанда шинонида шуд,  ки дар оянда ба зебоӣ, тозагӣ ва беҳдошти экологии пойтахт мусоидат менамоянд.

АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон иттилоъ медиҳад, ки  дар ҳашари  ниҳолшинонӣ  ректори Донишгоҳи байналмилалии сайёҳӣ ва соҳибкории Тоҷикистон, роҳбарони воҳидҳои сохторӣ, омӯзгорон ва кормандони донишгоҳ фаъолона иштирок намуданд.

Ин ҳашар дар доираи амалисозии ташаббусҳои Президенти Ҷумҳурии Тоҷикистон муҳтарам Эмомалӣ Раҳмон оид ба сабзазоркунии муҳити зист ва ба мамлакати сабз табдил додани Тоҷикистон, инчунин иқдоми созандаи Раиси шаҳри Душанбе муҳтарам Рустами Эмомалӣ барои ободу зебо гардонидани пойтахт гузаронида шуд.

Чунин ҳашарҳо минбаъд низ идома меёбанд, зеро на танҳо ба беҳбуди муҳити атроф, балки ба баланд бардоштани маърифати экологӣ ва масъулияти шаҳрвандон дар ҳифзи табиат мусоидат менамоянд.

 АКС: Донишгоҳи байналмилалии сайёҳӣ ва соҳибкории Тоҷикистон