Таҳкими ҳамкории Тоҷикистон бо Созмони Милали Муттаҳид баррасӣ гардид

ДУШАНБЕ, 22.03.2025. /АМИТ «Ховар»/. 21 март дар қароргоҳи Созмони Милали Муттаҳид мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин ва раиси Иҷлосияи 79-уми Маҷмаи Умумии Созмони Милали Муттаҳид Филемон Янг баргузор гардид. Дар ин хусус АМИТ «Ховар» бо истинод ба Вазорати корҳои хориҷии мамлакат хабар медиҳад.

Дар мулоқот доираи васеи масъалаҳои мубрами глобалӣ, аз ҷумла тағйирёбии иқлим, амнияти байналмилалӣ ва мубориза бо терроризм мавриди баррасӣ қарор гирифтанд.

Ҷонибҳо ҳамчунин аҳамияти таҳкими минбаъдаи ҳамкориҳои Созмони Милали Муттаҳид ва кишварҳои узвро барои ҳалли самараноки ин чолишҳо таъкид доштанд.

Ҳамзамон қабул гардидани қатъномаи Маҷмаи Умумӣ оид ба «Рӯзи ҷаҳонии Футбол» бо ибтикори Тоҷикистон барои рушди соҳаҳои варзиш, аз ҷумла футбол муҳим арзёбӣ гардид.

Вазири корҳои хориҷии Ҷумҳурии Тоҷикистон Сироҷиддин Муҳриддин ҳамчунин бо муовини Дабири кулли СММ оид ба кор бо Маҷмаи Умумӣ ва мудирияти конфронсҳо Мовсес Абелян мулоқот намуд.

Дар вохӯрӣ оид ба масоили ҳамкорӣ байни Тоҷикистон ва Созмони Милали Муттаҳид ва баргузории конфронсҳои дарпешистода, аз ҷумла Конфронси СММ бахшида ба ҷамъбасти Даҳсолаи байналмилалии амал «Об барои рушди устувор» соли 2028 дар Душанбе табодули афкор анҷом дода шуд.

21 март дар қароргоҳи Созмони Милали Муттаҳид дар Ню-Йорк мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо ёвари Дабири кулли СММ, муовини маъмури Барномаи рушди Созмони Милали Муттаҳид, Директори минтақавии Барномаи Рушди СММ оид ба Аврупо ва Иттиҳоди Давлатҳои Мустақил Ивана Живкович баргузор гардид.

Зимни мулоқот вазъи кунунӣ ва дурнамои рушди ҳамкории Тоҷикистон ва Барномаи рушди Созмони Милали Муттаҳид, ҳамчунин масъалаҳои марбут ба татбиқи лоиҳаҳои ин Барнома, ки ба рушди иҷтимоию иқтисодии кишвар нигаронида шудаанд, мавриди баррасӣ қарор гирифтанд.

Вазири корҳои хориҷии Ҷумҳурии Тоҷикистон Сироҷиддин Муҳриддин дар қароргоҳи Созмони Милали Муттаҳид бо муовини Дабири кулли СММ оид ба масъалаҳои иқтисодӣ ва иҷтимоӣ Ли Ҷунҳуа низ мулоқот намуд.

Зимни вохӯрӣ масъалаҳои мубрами ҳамкорӣ байни Тоҷикистон ва Раёсат оид ба масъалаҳои иқтисодӣ ва иҷтимоии СММ (UN DESA), аз ҷумла иқдомҳои муштарак дар самти пешбурди се рукни рушди устувор – иҷтимоӣ, иқтисодӣ ва экологӣ мавриди баррасӣ қарор гирифт.

Инчунин ҷонибҳо роҷеъ ба талошҳои муштарак дар пешбурди рӯзномаи ҷаҳонии об, аз ҷумла баргузории Конфронси байналмилалӣ оид ба ҳифзи пиряхҳо (Душанбе, 29 — 31 майи 2025) ва Конфронси СММ бахшида ба ҷамъбасти Даҳсолаи байналмилалии амал «Об барои рушди устувор» (Душанбе, соли 2028) табодули афкор намуданд.

АКС: Вазорати корҳои хориҷии Ҷумҳурии Тоҷикистон