Ҷараёни иҷрои «Барномаи рушди соҳаи тандурустии Тоҷикистон барои солҳои 2021–2025» натиҷагирӣ карда шуд

ДУШАНБЕ, 14.04.2025. /АМИТ «Ховар»/. Дар шаҳри Душанбе доир ба натиҷагирии ҷараёни иҷрои «Барномаи рушди соҳаи тандурустии Тоҷикистон барои солҳои 2021–2025» ҳамоиш баргузор гардид.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» иттилоъ доданд, дар он натиҷаҳои арзёбии миллӣ оид ба истифодаи далелҳо дар таҳияи сиёсатҳои тандурустӣ муаррифӣ ва муҳокима карда шуданд.

Дар идома барои таҳияи «Харитаи роҳ» мубодилаи афкор намуда, таҳияи чунин ҳуҷҷати муҳимро барои беҳтар намудани вазъи солимии аҳолӣ дар минтақа зарурӣ арзёбӣ намуданд.

Таҳияи харитаи роҳ афзалиятро барои таҳкими иқтидори институтсионалӣ, ҳамкории ҷонибҳо ва сохторҳои идоракунӣ дар самти татбиқи қабули қарорҳои ба далелҳо асосёфта муайян менамояд. Нақшаи амал аз ҷониби шуъбаи таҳлили тандурустии Вазорати тандурустӣ ва ҳифзи иҷтимоии аҳолӣ ва коршиносони Созмони ҷаҳонии тандурустӣ дар оянда таҳия ва тасдиқ мегардад.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон