Дар Душанбе доир ба беҳтар гардонидани сифати ғизо ҳамоиш доир шуд

ДУШАНБЕ, 22.04.2025. /АМИТ «Ховар»/. Имрӯз дар шаҳри Душанбе доир ба беҳтар гардонидани вазъи ғизо барои мустаҳкам намудани саломатии аҳолӣ ҳамоиш доир шуд.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ доданд, ҳамоиш бо мақсади  таъсиси «Фонди миллии гардиш» «премикс» дар Тоҷикистон баргузор гардид.

Масъалаи ташкили ғизои аҳолӣ яке аз самтҳои асосии стратегии сиёсати Ҳукумати мамлакат ба шумор рафта, давоми солҳои охир қабул гардидани 2 қонун, 2 стратегия, 4 барнома ва 1 нақшаи сатҳи миллӣ гувоҳи муҳим будани  ин масъала мебошад.

Ҷумҳурии Тоҷикистон соли 2013 ҳамчун давлати 42-юм ба Ҳаракати глобалии васеъкунии ғизо (SUN) дохил гардид. Аз соли 2015 дар мамлакат Шурои ҳамоҳангсозии байнисоҳавӣ оид ба ғизо фаъолият дорад. Ба он тамоми намояндагони вазорату идораҳои давлатӣ, шарикони рушд, ташкилоти ғайридавлатӣ ва ҷомеаи шаҳрвандӣ дохил мебошанд.

 АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон