Дар Вашингтон дурнамои ҳамкории тиҷоратию иқтисодии Тоҷикистон ва Амрико баррасӣ гардид

ДУШАНБЕ, 25.04.2025 /АМТИТ «Ховар»/. Дурнамои ҳамкорӣ ва имконоту иқтидори густариши муносибатҳои тиҷоратию иқтисодии Тоҷикистон ва Амрико дар Вашингтон дар мулоқоти ҳайати Тоҷикистон таҳти роҳбарии муовини якуми Сарвазири ҷумҳурӣ  Ҳоким Холиқзода бо намояндагони Шурои соҳибкорони Тоҷикистону Амрико баррасӣ шуд, иттилоъ медиҳад АМИТ «Ховар» бо истинод ба Бонки миллии Тоҷикистон.

Иброз гардид, ки дар солҳои ҳамкорӣ байни Тоҷикистон ва Амрико фазои шарикии устувор ва фаъоли рушдкунанда фароҳам гардида, ҳарду давлат дар муносибатҳои дуҷониба дар масъалаҳои мавриди таваҷҷуҳи якдигар ҳамкории самаранок анҷом медиҳанд. Тоҷикистон ба сатҳи кунунии муносибатҳои шарикӣ бо Амрико баҳои баланд дода, таҳкими равобити мутақобили судманди тиҷоратӣ, иқтисодӣ ва сармоягузорӣ бо ин кишварро дар сиёсати хориҷии худ аз самтҳои муҳим мешуморад.

Иброз гардид,  ки қонунгузории Тоҷикистон барои ширкатҳои дохилӣ ва хориҷӣ ҳуқуқ ва имтиёзҳои баробар пешбинӣ менамояд. Дар робита ба ин, барои ба сатҳи нав баровардани муносибатҳои судманди тиҷоратию иқтисодӣ ба таваҷҷуҳи соҳибкорону сармоягузорони Амрико имконияту иқтидори самтҳои ҳамкорӣ дар бахшҳои гидроэнергетика, сайёҳӣ, инфрасохтори транзитӣ, саноатӣ ва коркарди маҳсулоти аз лиҳози экологӣ тоза муаррифӣ гардид. «Имрӯз дар Тоҷикистон иқтисоди бисёрсоҳа бо дурнамои рушд шакл гирифта, барои ҳавасмандгардонии сармоягузорон ва фароҳам овардани шароити мусоид барои пешбурди фаъолияти соҳибкорӣ пайваста тадбирҳои зарурӣ андешида мешаванд. Мо тамоми шароитро фароҳам меорем, ки сармоягузорон худро дар фазои эътимод ва боварӣ эҳсос намоянд ва лоиҳаҳои худро дар Тоҷикистон амалӣ созанд», – гуфт муовини якуми Сарвазири Тоҷикистон  дар ҷамъбасти мулоқот.

         АКС: Бонки миллии Тоҷикистон