Кишоварзони Шаҳринав дар 300 гектар пунбадона кишт менамоянд

ДУШАНБЕ, 20.04.2025 /АМИТ «Ховар»/. Тибқи дурнамо, кишоварзони ноҳияи Шаҳринав дар мавсими кишту кори баҳорӣ тасмим гирифтаанд, ки дар 300 гектар пунбадона кишт  намоянд, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии ноҳияи Шаҳринав.

Аз 300 гектар кишти пунбадона дар 60 гектараш кишти зери плёнка, ки дар таҷрибаи ноҳия ин усули нав ва бори якум аст, гузаронида мешавад.

Қобили тазаккур аст, ки бо мақсади иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон, ки дар ҷаласаи васеи ҳукумат баён гардиданд, имрӯзҳо дар хоҷагиҳои деҳқонию ҷамоавии ноҳия тибқи дурнамо кишти чигит идома дошта, тадбирҳо барои иҷрои нақшаи дурнамои кишт вусъат меёбанд.

Аз ҷумла, дар Кооперативи истеҳсолии «Наврӯз» кишти чигити зери плёнка дар майдони омодакарда, ки 20 гектарро ташкил менамояд, гузаронида шудааст. Ба ҳамин тартиб, дар тамоми хоҷагиҳои кишоварзии ноҳия кишти пунбаи зери плёнка бо истифода аз обу ҳавои мусоид гузаронида мешавад.

АКС: Мақомоти иҷрояи ҳокимияти давлатии ноҳияи Шаҳринав