Тоҷикистон: Дар беш аз 590 ҳазор гектар шудгор гузаронида шудааст

ДУШАНБЕ, 06.04.2025. /АМИТ «Ховар»/. Дар мамлакат то аввали моҳи апрел дар 593 ҳазору 517 гектар шудгор ва дар 102 ҳазору 522 гектар кишти баҳорӣ гузаронида шудааст. Дар ин хусус ба АМИТ «Ховар» аз Вазорати кишоварзии Ҷумҳурии Тоҷикистон иттилоъ доданд.

Иттилоъ дода шуд, ки аз майдони киштшуда ғалладонагиҳо 46 623 гектар, гандум 19 350 гектар, ҷав 24 604 гектарро ташкил дода, дигар навъҳои маҳсулоти кишоварзӣ низ кишт гардидааст.

Ба тавсияи олимони соҳаи кишовразии мамлакат, яке аз омилҳои ба даст овардани ҳосили фаровон киштгардонӣ мебошад. Инчунин баъд аз ҷамъоварӣ намудани ҳосили картошка ва пиёз мо метавонем дар ин замин зироати донагӣ парвариш намоем ва дар қаторҷӯйҳои он офтобпараст кишт кунем. Пас аз ҷамъоварии зироати донагӣ кишоварзон ҷуворимакка метавонанд кишт кунанд, ки ин ҳам барои дон ва ҳам хӯроки чорво зироати муфид аст. Бо ин амал мо заминҳоро самаранок истифода мебарем.

Агар дар як замин ду ё се сол як зироатро кишт намоем, ҳосили он кам мегардад. Инчунин мо бояд маданияти заминдориро баланд бардорем, ба холӣ мондани заминҳои корам роҳ надиҳем, аз ҳар қитъа замин, аз ҷумла қитъаҳои замини наздиҳавлигӣ самаранок истифода карда, аз заминҳои обӣ гирифтани се ва ҳатто чор ҳосилро омӯзем.

Агар мо кишти такрориро васеъ ҷорӣ карда тавонем, метавонем ҳарчи бештар маҳсулот истеҳсол намоем.

АКС: АМИТ «Ховар»