Файзалӣ Идизода бо Раиси Кумитаи Думаи давлатии Федератсияи Русия вохӯрӣ намуд

ДУШАНБЕ, 14.11.2025 /АМИТ «Ховар»/. Имрӯз дар доираи ҷаласаи 59-уми пленарии Ассамблеяи байнипарламентии давлатҳои иштирокдори Иттиҳоди Давлатҳои Мустақил, вохӯрии Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Раиси Кумитаи Думаи Давлатии Федератсияи Русия оид ба корҳои Иттиҳоди Давлатҳои Мустақил, ҳамгироии Авруосиё ва робита бо ҳамватанон Леонид Калашников баргузор гардид. Дар ин хусус ба АМИТ «Ховар» аз Маҷлиси намояндагон хабар доданд.

Иброз гардид, ки муносибатҳои байнипарламентии давлатҳо рӯз ба рӯз густариш меёбад, ки ин барои рушду таҳкими муносибатҳо дар ҳама соҳаҳо, аз ҷумла маориф, илм, фарҳанг, маънавиёт, иҷтимоиёт, сайёҳӣ ва варзиш заминаи устувор фароҳам меорад.

Гуфта шуд, ки забони русӣ дар мамлакати мо мақоми конститутсионӣ дошта, ҳамчун забони муоширати байни миллатҳо амал мекунад. Шумораи муассисаҳои таҳсилоти умумӣ бо забони русӣ сол ба сол дар Тоҷикистон зиёд мешавад.

Таъкид гардид, ки мулоқоти имрӯза низ ба таҳкими муносибатҳои байнипарламентии ду давлат, дӯстӣ ва густариши робитаҳо дар ҳама соҳаҳо мусоидат менамояд.

АКС: Маҷлиси намояндагони Маҷлиси Олии Ҷумҳурии Тоҷикистон