Дар Олимпиадаи Рио-2016 варзишгарони 80 кишвар соҳиби медал гардиданд

Август 18, 2016 17:20

Душанбе, 18.08.2016. /АМИТ «Ховар»/. Баъди натиҷагирии рӯзи дувоздаҳуми мусобиқот аз рӯи барномаи Бозиҳои XXXI тобистонаи олимпӣ мисли пешин дар садри феҳрасти кишварҳои ҷоизадор дастаи мунтахаби  ИМА бо 93 медал (30 тилло, 32 нуқра ва 31 биринҷӣ) қарор дорад. Британияи Кабир бо 50 медал (19 тилло, 19 нуқра ва 12 биринҷӣ) дар ҷойи дувум аст. Чин бо 54 медал (19 тилло, 15 нуқра ва 20 биринҷӣ) дар ҷойи сеюм  мебошад.
Дар ин бора  ба АМИТ «Ховар» аз Кумитаи  миллии олимпии  Тоҷикистон  хабар доданд.
Ба даҳгонаи беҳтарин инчунин Русия (12-14-15), Олмон (12-8-9), Ҷопон (10-5-18), Фаронса (8-11-12), Италия (8-9-6), Нидерланд (8-4-3), Австралия (7-8-9) дохиланд. Умуман, то ҳоло варзишгарони 80 кишвар медалҳои олимпии Рио-2016-ро ба даст овардаанд.
Бояд зикр кард, ки варзишгарони 54 кишвар барандагони медалҳои тиллои Бозиҳои XXXI тобистонаи олимпӣ шудаанд. Аз миёни кишварҳои собиқи шӯравӣ ба ҷуз Русия, боз ёздаҳ кишвар — Қазоқистон (3 медали тилло, 3 нуқра ва 6 биринҷӣ,  ҷойи 18-ум), Узбекистон (2 медали тилло, 1 медали нуқра ва 4 медали биринҷӣ,  ҷойи 26-ум), Украина (1 медали тилло, 4 медали нуқра ва 2 биринҷӣ,  ҷойи 33-юм), Арманистон (1 медали тилло ва 3 медали нуқра,  ҷойи 36-ум), Беларус (1 медали тилло, 2 медали нуқра ва 2 медали бириҷӣ,  ҷойи 37-ум), Гурҷистон (1 медали тилло, 1 медали нуқра ва 3 биринҷӣ,  ҷойи 41-ум), Озарбойҷон (3 медали нуқра ва 4 биринҷӣ  ҷойи 55-ум), Литва (1 медали нуқра ва 2 биринҷӣ,  ҷойи 59-ум), Қирғизистон (1 медали биринҷӣ,  ҷойи 70-ум), Молдова (1 медали биринҷӣ,  ҷойи 70-ум) ва  Эстония (1 медали биринҷӣ,  ҷойи 70-ум)  ба гирифтани медалҳои олимпии Рио мушарраф гаштаанд.
Хотиррасон менамоем, ки дар Олимпиадаи Рио то ҳоло варзишгарони се кишвари собиқи шӯравӣ — Латвия, Тоҷикистон ва Туркманистон  медал ба даст наовардаанд.
Умеди охирин ба гурзандози машҳури тоҷик Дилшод Назаров аст. Ин варзишгари 34-сола, ки  бори чаҳорум дар Бозиҳои олимпӣ иштирок мекунад, зимни суҳбат бо хабарнигорон  гуфт, ки тамоми қувва ва маҳораташро барои ба даст овардани медали олимпӣ равона хоҳад кард.
Ёдовар  мешавем, ки мусобиқоти ниҳоии гурзандозӣ шаби 19 август соати 21:05 ба вақти маҳаллӣ (соати 5:05-и 20 август ба вақти Душанбе) дар Варзишгоҳи олимпии шаҳри Рио-де-Жанейрои Бразилия шуруъ мешавад.

Август 18, 2016 17:20

Хабарҳои дигари ин бахш

Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд
Кишоварзони ноҳияи Зафаробод дар 120 гектар картошкаи барвақтӣ кишт менамоянд
Дар Агентии содироти Тоҷикистон бо намояндагони Агентии назорати давлатии молиявӣ ва мубориза бо коррупсия вохӯрӣ доир шуд
Ба кишоварзони ноҳияи Деваштич барои парвариши картошка ва тухмиҳои хушсифат тавсияҳо дода шуд
Дар ноҳияи Спитамени вилояти Суғд кишти чигит оғоз ёфт