ДАР ВИЛОЯТИ СУҒД НАМОЯНДАГИИ ТИҶОРАТИИ ФЕДЕРАТСИЯ РУСИЯ КУШОДА ШУД

Азимбой Азимов намояндаи ваколатдори тиҷоратии Русия дар вилояти Суғд таъин гардид. Вазифаи намояндагии тиҷоратӣ ривоҷ додани ҳамкории соҳибкорону тоҷирони Русия бо минтақаҳои Ҷумҳурии Тоҷикистон, мусоидат дар бобати интихоби шарикон, зиёд кардани ҳаҷми хариду фурӯши мол дар байни Тоҷикистон ва Русия, тақвияти ҳамкории минтақаҳои Русия ва Тоҷикистон, мусоидат ба амалӣ сохтани барномаҳои байниминтақавӣ, ташкили корхонаҳои муштарак ва дар бозори Тоҷикистон ба фурӯш баровардани молҳои сохти Русия, аз Тоҷикистон ба Русия фиристодани маҳсулоти кишоварзӣ ва ғайра мебошад. Намояндаи ваколатдори тиҷоратии Русия вобаста ба масъалаҳои тайёрӣ ба мулоқоти намояндагони парлумонҳои Тоҷикистону Русия дар масъалаи истифодаи имкониятҳои ҳамкории минтақаҳои ҳар ду мамлакат вазифадор карда мешавад, ки аз ҷониби Русия дар тадбирҳои омода сохтану гузаронидани мулоқоти мазкур ширкат варзад.