ТОҶИКИСТОН ХОНАИ УМЕДИ ТОҶИКОН ВА ФОРСИЗАБОНОНИ ҶАҲОН АСТ

Мавриди зикр аст, ки бо ташкили Анҷумани «Пайванд» бисёр ҳамватанони мо аз кишварҳои гуногуни Шарқу Ғарб ба ватани аҷдодиашон омада, бо дастовардҳои Тоҷикистони соҳибистиқлол ошно гардиданд ва бо ифтихор ин сарзаминро хонаи умеди худ хонданд. Нақши Анҷумани «Пайванд» дар тавсиа ва таҳкими робитаю муносибатҳои дӯстонаю ҳасана бо ҳамватанону ҳамзабонони мо, ки муқими Афғонистону Эрон, Чину Ҳиндустон, Олмону Канада, Амрикову Британияи Кабир, Фаронсаву Ҳоланд, Қазоқистону Қирғизистон ва Русия мебошанд бузург аст. Муовини раиси Кумитаи иҷроияи Анҷумани тоҷикон ва форсизабонони ҷаҳон «Пайванд» Зафар Зарифов дар сӯҳбат ба хабарнигори АМИТ «Ховар» гуфт, ки Анҷумани «Пайванд» дар фаъолияти худ ҷиҳати густариши робитаҳои фарҳангӣ бо ҳамватанону ҳамзабонони бурунмарзӣ, омӯзиши ҷамъиятҳои миллӣ ва марказҳои фарҳангии тоҷикон ва барқарор кардани робитаҳо бо онҳо, доир намудани Анҷуманҳои тоҷикон ва форсизабонони ҷаҳон, шинохти тоҷику тоҷикистониён аз ҷониби ҷомеаи ҷаҳонӣ корҳои назаррасеро ба анҷом расонидааст. Анҷумани «Пайванд» дар баъзе кишварҳои ҷаҳон шӯъбаҳои худро дорад, ки онҳо баҳри тақвияти ҳамкории илмию фарҳангӣ ва шинохти тоҷику тоҷикистониён корҳои шоёнеро ба сомон расониданд. Аз давраи таъсисёбӣ дар шаҳри Душанбе 6 маҷлиси умумии Анҷуман доир гардид, ки дар он меҳмонони зиёд ва тоҷикону форсизабонони ҷаҳон иштирок доштанд.