БОЗДИДИ Д.МЕДВЕДЕВ ВА Э.РАҲМОН АЗ МАВҚЕИ ПОЙГОҲИ НИЗОМИИ РУСИЯ ДАР ЧТ

              Душанбе, 30 август. (АМИТ «Ховар»). — Сарони давлатҳои Русия ва Тоҷикистон Дмитрий Медведев ва Эмомалӣ Раҳмон 29 август аз мавқеи пойгоҳи низомии 201 — уми Русия боздид ба амал оварданд, ки дар каламрави Тоҷикистон ҷой дода шудааст. Сарони ҳар ду давлатро фармондеҳи пойгоҳи низомӣ, генерал — майор Алексей Завизон пешвоз гирифт. Вай ба сарварони ҳар ду давлат пешниҳод кард, ки дар аввал намунаи навъҳои гуногуни техникаи ҳарбиро аз назар гузаронанд. Бояд гуфт, ки пойгоҳи низомӣ бо техникаи навтарин мусаллаҳ карда шудааст. А.Завизон зикр намуд, ки ҳамаи мошинҳои дар намоиш гузошташуда нав ва қобили кор буда, мунтазам дар машқҳо истифода карда мешаванд.               Д.Медведев ва Э.Раҳмон баъди аз назар гузаронидани техникаи ҳарбӣ ба ситоди пойгоҳи низомӣ омаданд. Фармондеҳи пойгоҳи низомӣ дар ин ҷо ба онҳо дар бораи фаъолияти пойгоҳ ва таъминоти он ҳисобот дод. Қайд карда шуд, ки солҳои охир ягон хизматчии ҳарбӣ дар бораи пеш аз мӯҳлат аз хизмат озод шудан ариза надодааст. Ба қавли фармондеҳи пойгоҳи низомӣ, ҳамаи аскарону афсарон бо манзил ва лавозимоти зарурӣ таъмин карда шудаанд. Фармондеҳи пойгоҳ ба сарони ҳар ду давлат иттилоъ дод, ки роҳбарияти он бо мақомоти Тоҷикистон самарабахш ҳамкорӣ мекунад.