НИМПАЙКАРАИ РӮДАКӢ ДАР ДЕҲКАДАИ ШАЙДОН ГУЗОШТА ШУД

Ашт, 27 август. (АМИТ «Ховар», Санавбар Мақсудова). — Дар маркази ноҳияи Ашт – деҳкадаи Шайдон нимпайкараи асосгузори адабиёти классикии тоҷику форс Абӯабдулло Рӯдакӣ дар вазъияти ботантана кушода шуд. Дар он ветеранҳои ҷанг, собиқадорони меҳнат, намояндагони зиёиёни ноҳия ва меҳмонон ширкат варзиданд. Ҷамъомадагонро ба муносибати 1150 – солагии Одамушшуаро раиси вилоят Қоҳир Расулзода ва раиси ноҳия Давронҷон Зоҳидов табрик намуданд. Дар ҷамъомад профессор Карим Абдулов, шоир Аҳмадҷон Раҳматзод, нависандагон Додоҷон Раҷабӣ, Додохон Эгамзод, Муҳиддин Хоҷаев ва дигарон иштирок доштанд. Муаллифи нимпайкара рассом ва ҳайкалтарош Фирӯз Шарифов мебошад. Барои сохтани он аз буҷети маҳаллӣ 145 ҳазор сомонӣ сарф шуд. Мухбири АМИТ «Ховар» хабар медиҳад, ки дар деҳаи Ҷарбулоқи ноҳия бинои нави мактаби миёнаи № 6 ба истифода дода шуд. Дар ин ҷо 1228 талаба таҳсил хоҳад кард. Сокинони деҳа ва талабагонро ба ин муносибат раиси вилоят Қ. Расулзода ва раиси ноҳия Д. Зоҳидов табрик намуданд. Раиси вилоят ба шарафи оғози соли нави таҳсил ба мактабҳои ноҳия 30 компютер тӯҳфа намуд.