ПОДПОЛКОВНИКҲОИ НАШЪАҶАЛЛОБ АЗ ОЗОДӢ МАҲРУМ ШУДАНД

Душанбе, 18 август. (АМИТ «Ховар», Мавҷуда Давлатзода). – Суди ҳарбии гар-низони Душанбе подполковникҳои собиқи Кумитаи давлатии амнияти миллии ҷумҳурӣ Анвар Шоимардонов ва Файзулло Ҳалимовро мувофиқан ба мӯҳлати 19 ва 18 сол аз озодӣ маҳрум кард. Онҳо мувофиқи моддаҳои гуногуни Кодекси ҷиноии ҷумҳурӣ ба хариду фурӯши ғайриқонунии маводи нашъадор, хариду фурӯши ғайриқонунӣ бо пули хориҷӣ, қочоқ ва риоя накардани қоидаҳои хизмат дар минтақаи сарҳад гунаҳкор карда мешаванд. Инчунин, шарикони онҳо Зоирҷон Тӯраев, Амриддин Қирғизов, Исматулло Ортиқов, Парвиз Тошев, Иззатулло Аллаев ва Абдуҷаббор Маҳмадаминов ба мӯҳлатҳои гуногун аз озодӣ маҳрум шуданд. Тавре АМИТ «Ховар» хабар дода буд, кормандони Кумитаи давлатии амнияти миллӣ 24 – 25 январи соли равон дар ҷараёни амалиёти махсус дар ҳудуди ноҳияи Шаҳритус дар минтақаи сарҳад гурӯҳи ҳаштнафараи қочоқчиёни маводи нашъадорро фош карда, безарар гардонд, ки ба он кормандони Кумитаи давлатии амнияти миллӣ низ шомил буданд. Ҳамон вақт аз қочоқчиён қариб 1,5 тонна маводи нашъадор, аз ҷумла, 73 килограм героин, 345 килограм афюн, 19 килограм хашиш ва 12,5 ҳазор доллари ИМА мусодира карда шуд.