ВКХ ЧИН : «МУЛОҚОТИ СҲШ ДАР ДУШАНБЕ БА ТАЪМИНИ СУЛҲУ СУБОТИ МИНТАҚА МУСОИДАТ

Ин сафарҳо барои равнақу ривоҷи минбаъдаи муносибатҳои дуҷонибаю бисёрҷониба ва мустаҳкам сохтани равобити дӯстона аҳамияти калон доранд. Намояндаи ВКХ Чин зикр кард, ки муносибатҳои ҳар ду мамлакат дар соҳаҳои тиҷорату иқтисод, нақлиёт, алоқа, бунёди соҳаҳои ёрирасон, маориф, фарҳанг ва варзиш дар давоми солҳои охир муттасил густариш меёбанд. Қайд карда шуд, ки мулоқоти имсолаи сарони давлатҳои аъзои Созмони ҳамкории Шанхай дар заминаи имзои Аҳдномаи ҳусни ҳамҷаворӣ, дӯстӣ ва хамкории мамлакатҳои аъзо даъват карда мешавад. Бо ҳамин мулоқот марҳалаи нави густариши фаъолияти созмон дар асоси боварию эътимод ба ҳамдигар ва афзунтар сохтани нуфузи созмон дар арсаи байналмилалӣ оғоз меёбад. Ин мулоқот тадбири муҳимтарини СҲШ дар соли равон мебошад. Мулоқот барои таъмини амният ва суботи минтақа ва саросари ҷаҳон аҳамияти хеле муҳим дорад. Пешбинӣ карда мешавад, ки сарони давлатҳои аъзо дар бораи мавқеи мамлакатҳояшон дар бораи баъзе проблемаҳои минтақавию байналхалқӣ ҳуҷҷати сиёсӣ имзо хоҳанд кард. Инчунин дар фарҷоми мулоқот Низомномаи созмон дар бораи мушорикат ва муколама имзо хоҳад шуд.