ҚАРОРИ РАИСИ ШАҲР ДАР БОРАИ ДАЪВАТИ ШАҲРВАНДОН БА ХИЗМАТИ ҲАРБӢ

Душанбе, 24 сентябр. (АМИТ «Ховар», Бекназари Абӯбакр). — Раиси шаҳри Душанбе Маҳмадсаид Убайдуллоев бо мақсади иҷрои фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллудашон 1981-1990 ба хизмати ҳарбӣ» қарор қабул кард. Дар қарори мазкур аз ҷумла омадааст, ки комиссариатҳои ҳарбии ноҳияҳои шаҳри Душанбе бо назардошти хусусиятҳои хоси хизмат, дар навбати аввал Қушунҳои сарҳадии Кумитаи давлатии амнияти миллии Ҷумҳурии Тоҷикистонро бо даъватшавандагони ба таври дақиқ интихобшуда, мукаммал намоянд. Инчунин, таъқид шудааст, ки Раёсати тандурустии шаҳри Душанбе комиссияҳои тиббиро бо духтурони ботаҷрибаи соҳаи тиб ва мошинҳои ёрии таъҷилӣ таъмин намояд. Раисони ноҳияҳои пойтахт вазифадор шудаанд, ки ҳамроҳи комиссариатҳои ҳарбии ноҳияҳои шаҳри Душанбе ва мақомоти корҳои дохилӣ дар давраи даъвати шаҳрвандон ба хизмати ҳарбӣ назорати қатъиро барои аз ҳудуди пойтахт баромада нарафтани даъватшавандагон, пурзӯр ва ба ихтиёри комиссариатҳои ҳарбӣ аз корхона, муассиса ва ташкилотҳо 10 нафарӣ кормандони техникиро сафарбар намоянд. Раёсати корҳои дохилии шаҳри Душанбе, шӯъбаҳои корҳои дохилии ноҳияҳои пойтахт ба комиссариатҳои ҳарбии шаҳри Душанбе ҷиҳати ҳозир шудани даъватшавандагон ба марказҳои даъватӣ кӯмак намуда, нисбат ба шахсоне, ки аз даъват ба хизмати ҳарбӣ саркашӣ мекунанд, тадбирҳои зарурӣ андешида, ҷустуҷӯи онҳоро ба роҳ монанд.