ҲИСОБОТИ БОНКИ ҶАҲОНӢ БОРАИ БА РОҲ МОНДАНИ ТИҶОРАТ ДАР СОЛИ 2009

Душанбе, 5 сентябр. (АМИТ «Ховар», Наргис Бойахмедова).- 10 сентябр ҳисоботи Бонки ҷаҳонӣ дар бораи ба роҳ андохтани тиҷорат дар соли 2009 чоп карда мешавад. Дар ҳисобот шароити иқтисодӣ ва тиҷоратии 181 мамлакат таҳлил карда мешавад. Дар он ҳамчунин ҷараёни ислоҳот ва мамлакатҳое нишон дода мешаванд, ки мувофиқи 10 меъёри асосии танзим дар масъалаи то ҳадди микон осонтару соддатар гардонидани хариду фурӯши мол ҷойҳои муайянро ишғол менамоянд. Барои ин вақт, хароҷот, амалӣ сохтани талаботи ҳукуматҳо, оғози тиҷорат, ҷараёни он, пардохти андоз ва нишондодҳои дигар ба назар гирифта мешаванд. Дар ҳисобот сиёсати макроиқтисодӣ, сифати соҳаҳои ёрирасон, тағйир ёфтани қурби пул, сатҳи ҷиноят ва муносибати сармоягузорону харидорон ба инобат гирифта намешавад. Намояндагии Бонки ҷаҳонӣ дар Тоҷикистон кормандони воситаҳои ахбори оммавии ҷумҳуриро ба маросими шиносоӣ бо ҳисобот ва муҳокимаи он даъват мекунад. Намояндаи Бонки ҷаҳонӣ аз Ню-Йорк истода, бо иштирокчиёни нишасти матбуотӣ тавассути алоқаи мустақими видио сӯҳбат хоҳад кард. .