БА ҚАБУЛИ КОДЕКСИ ҶИНОИИ ҶУМҲУРӢ ДАҲ СОЛ ПУР ШУД

Душанбе, 16 сентябр. (АМИТ «Ховар», Людмила Дубинина). — Имрӯз дар Маркази тадқиқоти стратегии назди Президенти ҷумҳурӣ бахшида ба даҳсолагии қабули Кодекси ҷиноии ҷумҳурии Тоҷикистон конфронс баргузор гардид. Конфронс бо ташаббуси факултаи ҳуқуқи Донишгоҳи давлатии миллии Тоҷикистон ва Бунёди Фридрих Эберт гузаронида шуд. Дар он намояндагони Маҷлиси намояндагони Маҷлиси Олии ҷумҳурӣ, Суди олӣ, Прокуратураи генералӣ, Агентии назорати молиявии давлатӣ ва мубориза ба муқобили ришвахӯрӣ, олимон, омӯзгорон ва донишҷӯён ширкат варзиданд. Дар конфронс масъалаҳои марбут ба тағйироту иловаҳои дар давоми даҳ сол ба Кодекси ҷиноӣ дохилшуда, инчунин пурзӯр намудани масъулияти ҷинояткорон барои куштор, баъзе масъалаҳои алоҳидаи Кодекси ҷиноӣ дар бораи боздоштани иҷрои ҳукми қатл, шароити нигоҳ доштани маҳбусон, муқаррар намудани ҷазо барои исқоти ғайриқонунии ҳамл ва ғайра мавриди баррасӣ қарор гирифтанд. Дар ин масъалаҳо раиси Кумитаи тартиботи қонун, мудофиа ва амнияти Маҷлиси намояндагон Абдуманнон Холиқов, раиси Суди олӣ Нусратулло Абдуллоев, директори Агентии назорати давлатии молиявӣ ва мубориза ба муқобили ришвахӯрӣ Шерхон Салимзода, сардори раёсати Прокуратураи генералӣ Ҳабибулло Воҳидов ва дигарон изҳори ақида намуданд.